पुणे : कोंढवा परिसराला 'पाकिस्तानचं कराची शहर म्हणाला', भाजप पदाधिकाऱ्यावर गुन्हा दाखल
Pune Crime : पुण्याच्या कोंढवा परिसराची तुलना पाकिस्तानमधील 'कराची'शी करून आक्षेपार्ह व्हिडिओ पोस्ट केल्याप्रकरणी भाजपच्या युवा पदाधिकाऱ्यावर कोंढवा पोलीस ठाण्यात गुन्हा दाखल करण्यात आला आहे.
ADVERTISEMENT
बातम्या हायलाइट
पुणे : "कोंढवा म्हणजे पाकिस्तानचं कराची शहर",
आक्षेपार्ह टिप्पणी करणाऱ्या भाजप पदाधिकाऱ्यावर गुन्हा दाखल
Pune Crime : पुण्यातील कोंढवा परिसराला पाकिस्तानमधील 'कराची' संबोधून सोशल मीडियावर वादग्रस्त व्हिडिओ पोस्ट केल्याप्रकरणी भारतीय जनता पक्षाच्या युवा आघाडीच्या एका पदाधिकाऱ्यावर गुन्हा दाखल करण्यात आला आहे. या वादग्रस्त व्हिडिओमुळे शहरात मोठ्या प्रमाणावर संतापाची लाट उसळली असून कोंढवा पोलीस ठाण्यात यासंदर्भात रीतसर नोंद करण्यात आली आहे. संबंधित आरोपीने आपल्या वैयक्तिक सोशल मीडिया अकाउंटवरून एक व्हिडिओ शेअर केला होता, ज्यामध्ये त्याने कोंढवा परिसराचा उल्लेख 'कराची' असा केला आणि "Welcome to Karachi of Pakistan" असे आक्षेपार्ह कॅप्शन वापरले होते. या व्हिडिओमध्ये तो एका रुग्णालयाबाहेरील कथित अतिक्रमण आणि अव्यवस्थेवर बोट ठेवत होता. मात्र, त्याने यावेळी या परिसरात उल्लेख कराची असा केलाय. त्यामुळे स्थानिक नागरिकांच्या भावना दुखावल्या गेल्या आहेत.
धार्मिक तेढ निर्माण करण्याचा प्रयत्न केल्याचा आरोप
व्हिडिओमध्ये असा दावा करण्यात आला होता की, रुग्णालय परिसराच्या आजूबाजूला बेकायदेशीर दुकाने आणि तात्पुरते हातगाडे लावले गेले आहेत, जे नियमांचे आणि न्यायालयीन निर्देशांचे उल्लंघन करत आहेत. इतकेच नव्हे तर, रुग्णालय परिसरात दारूच्या रिकाम्या बाटल्या पडल्या असल्याचे दाखवून रुग्णालय संचालकांना त्रास दिला जात असल्याचा आरोपही करण्यात आला. या तक्रारींमध्ये धार्मिक संदर्भ जोडत मुस्लिम समुदायाचे लोक एका हिंदू व्यक्तीला त्रास देत असल्याचा दावा करण्यात आल्याने स्थानिक स्तरावर तणावाचे वातावरण निर्माण झाले. या व्हिडिओचा मूळ उद्देश रुग्णालयातील समस्या मांडण्याऐवजी दोन समुदायांमध्ये तेढ निर्माण करणे आणि परिसराची शांतता भंग करणे असा असल्याचे तक्रारदारांचे म्हणणे आहे.
कोंढवा पोलिसांकडून गुन्ह्याची दखल; भारतीय न्याय संहितेनुसार कारवाई सुरू
या वादग्रस्त व्हिडिओची माहिती मिळताच स्थानिक नागरिक आणि विविध पदाधिकाऱ्यांनी कोंढवा पोलीस ठाण्याबाहेर एकत्र येत तीव्र निषेध व्यक्त केला आणि संबंधित व्यक्तीवर कठोर कारवाई करण्याची मागणी लावून धरली. परिस्थितीचे गांभीर्य ओळखून पोलिसांनी या प्रकरणाची स्वतःहून दखल घेतली असून आरोपीविरुद्ध भारतीय न्याय संहितेच्या कलम 353(2) अंतर्गत गुन्हा दाखल केला आहे. हे कलम शांतता भंग करण्याच्या उद्देशाने जाणूनबुजून अपमान करण्याशी संबंधित आहे. या प्रकरणाचा सखोल तपास सुरू असल्याचे पोलीस अधिकाऱ्यांनी स्पष्ट केले आहे. सोशल मीडियावर पोस्ट केलेल्या त्या व्हिडिओला मुख्य आधार मानून ही कायदेशीर कारवाई करण्यात आली असून, आरोपीची बाजू अद्याप नोंदवण्यात आलेली नाही.
शांततेचे आवाहन आणि पोलिसांची सतर्कता; पुढील तपास सुरू
