NCP : शरद पवारांना जीवे मारण्याची धमकी, पुण्यातील आयटी इंजिनिअरला अटक

राष्ट्रवादी काँग्रेसचे अध्यक्ष शरद पवार यांना जीवे मारण्याची धमकी देण्यात आली होती. फेसबुक आणि ट्विटरसह सोशल मीडियावर जीवे मारण्याची धमक्या मिळाल्यानंतर पवार यांच्या कन्या आणि खासदार सुप्रिया सुळे यांनी मुंबई पोलिसांत तक्रार दाखल केली होती.

‘तुमचा लवकरच दाभोलकर होणार’ अशा प्रकारची धमकी एका पोस्टच्या माध्यमातून देण्यात आली होती. फेसबुकच्या धमकीबाबत राष्ट्रवादी काँग्रेसच्या एका कार्यकर्त्याने शुक्रवारी लोकमान्य टिळक मार्ग पोलीस ठाण्यात वेगळा गुन्हा दाखल केला होता. तपासादरम्यान, ज्या आयपी अॅड्रेसवरून पोस्ट अपलोड करण्यात आली होती, तो बर्वे यांचा असल्याचे गुन्हे शाखेला आढळून आले.

हेही वाचा >> वारकऱ्यांवरील लाठीचार्जवर देवेंद्र फडणवीस स्पष्टच म्हणाले, ‘मविआच्या काळात…’

शरद पवार यांना धमकी मिळाल्यानंतर मुख्यमंत्री एकनाथ शिंदे यांनी शरद पवार यांना जीवे मारण्याची धमकी सरकारने गांभीर्याने घेतली असून चौकशीचे आदेश दिल्याचे सांगितले होते. तर उपमुख्यमंत्री देवेंद्र फडणवीस यांनी अशा धमक्या खपवून घेतल्या जाणार नाहीत, असे सांगितले होते.

पवार हे ज्येष्ठ आणि आदरणीय नेते असल्याचे सांगून शिंदे यांनी निवेदनात म्हटले आहे की, त्यांच्या सुरक्षेसाठी आवश्यक ती सर्व खबरदारी घेतली जाईल. गरज पडल्यास पवारांची सुरक्षा वाढवण्यास पोलीस अधिकाऱ्यांना सांगण्यात आल्याचे मुख्यमंत्र्यांनी सांगितले होते.

धमकी प्रकरणावरून सुप्रिया सुळे का संतापल्या होत्या?

सोशल मीडियावरून धमकी देण्यात आल्यानंतर राष्ट्रवादी काँग्रेसच्या खासदार सुप्रिया सुळे यांनी मुंबईचे पोलीस आयुक्त विवेक फणसळकर यांची भेट घेतली होती. त्यांनी यासंदर्भात आयुक्तांकडे तक्रार केल्यानंतर माध्यमांशी बोलताना संताप व्यक्त केला होता.

“ट्विटरवरुन हा मेसेज आला आहे. कोणत्या तरी वेबसाईटवरुन धमकी दिली जात आहे. तसेच त्यांचे जे फॉलोवर्स आहेत या बाबतीत अशा कमेंट आल्या आहेत, ज्या अतिशय आक्षेपार्ह आहेत. या प्रकरणी गृह विभागाने तातडीने त्याची नोंद घ्यावी. मी आज मुंबईच्या सीपीपर्यंत हे पोहोचवलं आहे. पवार साहेबांबाबत जी धमकी ज्या पद्धतीने आली आहे ते दुर्दैवी आहे. राजकारणात मतभेद जरूर असतात. पण आता जेवढा द्वेष ज्या पद्धतीने पसरवला जात आहे समाजात. ते खूपच दुर्दैवी आहे”, असं सुप्रिया सुळे म्हणाल्या होत्या.

हेही वाचा >> “शरद पवारांना जे साधायचे ते त्यांनी साधलेच”, शिवसेनेचे (UBT) थेट भाष्य

20 ऑगस्ट 2013 रोजी अंधश्रद्धा निर्मूलन समितीचे अध्यक्ष नरेंद्र दाभोलकर यांची निर्घृण हत्या करण्यात आली होती. त्यांनी महाराष्ट्र अंधश्रद्धा निर्मूलन समितीची स्थापना केली होती.