औषध घेण्यास नकार दिल्याने व्यसनमुक्ती केंद्रात तरुणाची बेदम मारहाण करून हत्या; धक्कादायक घटनेने परिसरात खळबळ

सुरत मधील डुमास परिसरात 'रीवा व्यसनमुक्ती आणि पुनर्वसन केंद्र' नावाचे एक केंद्र कार्यरत आहे. या केंद्रामध्ये धवल राठोड याला त्याच्या व्यसनातून मुक्त करण्यासाठी 28 फेब्रुवारी रोजी दाखल करण्यात आले होते. मात्र दाखल झाल्याच्या काही दिवसांतच हा दुर्दैवी प्रकार घडला. मिळालेल्या माहितीनुसार, 1 मार्च रोजी धवलने केंद्रातील कर्मचाऱ्यांनी दिलेले औषध घेण्यास नकार दिला होता. याच कारणावरून केंद्रातील कर्मचारी आणि धवल यांच्यात जोरदार वाद झाला. हा वाद इतका विकोपाला गेला की तेथील कर्मचाऱ्यांनी संयम सोडून धवलला लाठ्याकाठ्यांनी बेदम मारहाण करण्यास सुरुवात केली.

हेही वाचा : विद्यार्थिनीला उचलून घेत मुख्याध्यापकाचा अश्लील गाण्यांवर डान्स, शिक्षक बघत बसले; जिल्हाधिकाऱ्यांचे चौकशीचे आदेश

या अमानुष मारहाणीत धवलच्या शरीराच्या अनेक भागांवर गंभीर जखमा झाल्या होत्या. मारहाणीनंतर 1 मार्चच्या रात्री धवलची प्रकृती अचानक खालावली. परिस्थिती हाताबाहेर जात असल्याचे पाहून केंद्रातील कर्मचाऱ्यांनी 108 क्रमांकाच्या रुग्णवाहिकेला पाचारण केले आणि त्याला तातडीने न्यू सिव्हिल हॉस्पिटलमध्ये दाखल केले. मात्र रुग्णालयात पोहोचण्यापूर्वीच धवलचा मृत्यू झाला होता. डॉक्टरांनी त्याला तपासून मृत घोषित केले. सुरुवातीला हा मृत्यू नैसर्गिक भासविण्याचा प्रयत्न झाला असला तरी, डॉक्टरांना धवलच्या शरीरावर मारहाणीच्या खुणा आढळल्याने संशय बळावला.