Sana Khan Murder: नदी, विहीर अन्..; सनाच्या हत्येची चक्रावून टाकणारी स्टोरी!

सना खानचा राजकारणात होता प्रभाव

हे कोडे सोडवण्यासाठी ही संपूर्ण कहाणी समजून घेणं आवश्यक आहे. ही कथा आहे सना खानची. (Sana Khan) वय साधारण 35-36 वर्षे. सना ही महाराष्ट्रातील नागपूर शहरातील एका व्यावसायिकाची मुलगी होती. सनाची आई महरुन्निसा या नागपुरातील काँग्रेस कार्यकर्त्या आणि सामाजिक कार्यकर्त्या आहेत. आईला पाहून सनाही राजकारणात रस घेऊ लागली. पण तिने भाजपमध्ये (BJP) प्रवेश केला. काही वेळातच त्या शहराच्या प्रमुख नेत्या बनल्या होत्या. केंद्रीय मंत्री नितीन गडकरी हेही नागपूर शहरातून येतात. सनाची गडकरींशीही चांगली ओळख होती. सना यांचा राजकारणातील काम पाहून पक्षाने त्यांना नागपूरच्या भारतीय जनता पार्टी युवा मोर्चाचे सरचिटणीस बनवले होते.

कथेत नवीन पात्राचा प्रवेश

आत्तापर्यंत सगळं व्यवस्थित चाललं होतं. सना राजकारणात झपाट्याने पुढे जात होती. पण त्यानंतर 2 ऑगस्टला सकाळीच सनाचे तीनही मोबाइल एकाच वेळी बंद झाले आणि इथूनच सुरू झाली एक नवीन कहाणी.

सनाचे तीन मोबाइल बंद

1 ऑगस्ट रोजी सना नागपूरहून जबलपूरसाठी निघाली. घरी तिने आईला जबलपूरला जाणार असल्याची माहितीही दिली होती. सनाचा एक मित्र जबलपूरला राहत होता. नाव होते अमित साहू. अमित साहू हा जबलपूरमधील एका ढाब्याचा मालक होता. 2 ऑगस्ट रोजी सकाळी सनाच्या आईने सनाला फोन केला तेव्हा तिचा फोन बंद होता. सना नेहमी 3 मोबाइल सोबत ठेवायची. आश्चर्य म्हणजे त्यावेळी तिचे तीनही मोबाइल बंद होते. असे यापूर्वी कधीच घडले नव्हते.

जबलपूर पोलिसांनी एफआयआर घेतला नाही

असाच संपू्र्ण दिवस गेला पण सनाशी काही संपर्क झाला नाही. 3 ऑगस्टलाही सनाचा मोबाइल बंद होता. त्यामुळे घाबरलेल्या कुटुंबीयांनी थेट जबलपूर गाठले. ते अमितला भेटले, पण अमितने एवढेच सांगितले की, सना आली होती पण 2 ऑगस्टलाच परतली. हे ऐकल्यानंतर कुटुंबीय जबलपूर पोलिसांकडे सनाच्या हरवल्याची तक्रार दाखल करण्यासाठी गेले. मात्र, जबलपूर पोलिसांनी एफआयआर घेण्याऐवजी हे प्रकरण नागपूर पोलिसांचे असल्याचे सांगून आपली जबाबदारी झटकली.

सनाचा मित्र अमित साहू याची चौकशी

हताश कुटुंब जबलपूरहून नागपूरला परतले. सना बेपत्ता झाल्याची तक्रार त्यांनी नागपूर पोलिसात दिली. सना ही शहरातील भाजपचे उदयोन्मुख नेता असल्याने पोलिसांनी तातडीने कारवाई सुरू केली. नागपूर पोलिसांचे पथक जबलपूरला पोहोचले. मात्र सर्व प्रयत्न करूनही सनाचा कोणताही सुगावा लागला नाही. आतापर्यंत बरेच दिवस निघून गेले होते. नागपूर पोलिसांनी अमित साहूची चौकशीही केली होती, मात्र त्याचा काही उपयोग झाला नव्हता.

अन् पोलिसांच्या रडारवर आला अमित साहू

नागपूर पोलिसांनी अमित साहूच्या वक्तव्याची चौकशी करण्याचा निर्णय घेतला. या संदर्भात, पोलिसांनी अमित साहू यांच्या घर आणि ढाब्याच्या आजूबाजूला लावलेले सीसीटीव्ही फुटेज तपासण्याचे ठरवले. त्यामुळे पहिले यश हाती लागले. अमित साहूच्या जबाबाच्या अगदी विरोधात, म्हणजे सना खान 1 आणि 2 ऑगस्ट रोजी अमितच्या या घरी येताना दिसली. मात्र ती घराबाहेर पडताना दिसली नाही. येथेच पोलिसांना प्रथम अमितवर संशय आला. आता पोलीस अमितच्या कॉल डिटेल रेकॉर्डची म्हणजेच सीडीआरची चौकशी केली. सना आणि अमित हे दोघेही अनेक महिन्यांपासून एकमेकांच्या संपर्कात होते असे कळते.

अमितच्या ढाब्यावरून सापडला पुरावा

दुसरीकडे, अमितलाही या पोलीस तपासाचा सुगावा लागला होता. त्यामुळे अमित अचानक गायब झाला. त्यामुळे नागपूर पोलिसांबरोबरच जबलपूर पोलिसांचेही धाबे दणाणले. सना आधीच बेपत्ता होती, आता अमितही गायब झालेला. त्यामुळे सगळ्यात आधी पोलीस हे अमितच्या ढाब्यावर पोहोचले. सनाचा शोध सुरू होऊन जवळपास आठवडा उलटलेला. तेव्हाच ढाब्याच्या एका कर्मचाऱ्याने पोलिसांना असा प्रकार सांगितला.. की, त्यामुळे संपूर्ण कहाणीच बदलून गेली.

कारच्या डिक्कीत होते रक्ताचे ठिपके

ढाब्याच्या कर्मचाऱ्याने पोलिसांना सांगितले की, अमित साहू 2 ऑगस्ट रोजी संध्याकाळी उशिरा त्याच्या कारमधून ढाब्यावर आला होता. यानंतर अमित साहूने त्याच कर्मचाऱ्याला गाडीची डिक्की व्यवस्थित धुण्यास सांगितली होती. कामगाराने डिक्की धुवायला सुरुवात केली तेव्हा त्याची नजर आतल्या काही रक्ताच्या थेंबांवर पडली. त्याने अमितला विचारले हे काय आहे? अमितने त्याला फटकारले आणि गाडी साफ कर असे सांगितले. यानंतर अमित तेथून गाडी घेऊन निघून गेला.

काय होते सनाच्या हत्येचे रहस्य

त्यामुळे बेपत्ता सना खानची हत्या झाली असावी या निष्कर्षापर्यंत पोलीस आले. पण खरं तर दोघेही मित्र होते, त्यामुळे अमितने सनाची नेमकी हत्या का केली असावी? हा मूळ प्रश्न होता. आता पोलिसांनी सना आणि अमितच्या नात्याकडे आपला मोर्चा वळवला.

सनाच्या कुटुंबीयांना अमितबद्दल विचारण्यात आले. त्यानंतर सनाच्या आईने एक गोष्ट सांगितली. ज्याबद्दल ती आतापर्यंत गप्प होती. सनाच्या आईच्या म्हणण्यानुसार, सना आणि अमितची सुमारे एक वर्षापूर्वी मैत्री झाली होती. मैत्रीचे रुपांतर प्रेमात झाले होते. यानंतर सुमारे 6 महिन्यांपूर्वी सना आणि अमितने कोर्टात लग्नही केले होते. तिच्याकडे दोघांचे लग्नाचे प्रमाणपत्रही आहे. तर सनाची आई आणि या मॅरेज सर्टिफिकेटनुसार सना आणि अमित हे पती-पत्नी होते. मग अमितने पत्नीची हत्या का केली? जिच्यासोबत त्याने सहा महिन्यांपूर्वीच कोर्टात लग्न केलेले.

सनाने अमितला दिलेले 50 लाख रुपये

या प्रश्नाचे उत्तरही सनाची आई महरुनिसा हिने दिले आहे. जबाबानुसार अमित जबलपूरमध्येच हॉटेल उघडणार होता. सनाला हेही माहीत होतं की त्याला ढाबा चालवण्याचा अनुभव आहे. त्यामुळे सनाने या हॉटेलमध्ये अमितसोबत पार्टनरशिप करण्याचा निर्णय घेतला. सनाने अमितला 50 लाख रुपये दिले. तेही घरच्यांना न कळवता. पैसे दिल्यानंतर अशा अनेक गोष्टी घडल्या, ज्यामुळे लवकरच अमित आणि सना यांच्यातील संबंध बिघडू लागले.

अमितकडून पैसे परत घेण्यासाठी सना गेली जबलपूरला

दुसरीकडे अमितच्या हॉटेलचे काम अजून सुरू झाले नव्हते. सना आता अमितकडे तिचे पैसे परत मागू लागली. एके दिवशी ती फोनवर पैशांबद्दल बोलत असताना सनाच्या आईने ते संभाषण ऐकले. सनाने अमितला 50 लाख रुपये दिल्याचे समजताच त्यांनी अमितकडून पैसे परत घे असं आपल्या मुलीला बजावलं.

यानंतर 1 ऑगस्ट रोजी सना नागपूरहून जबलपूरला अमितकडून पैसे परत घेण्यासाठी गेली. पण तिने सोबत कोणालाच न घेता एकटीने जबलपूरला जाणं पसंत केलं.

असा पकडला गेला अमित साहू

आता पोलिसांसमोर चित्र स्पष्ट होऊ लागले होते. ते आता फक्त अमित हातात येण्याची वाट पाहत होते. पोलिसांनी अमितच्या जवळचे नातेवाईक आणि मित्रांचे फोन नंबर यावर पाळत ठेवली. ही युक्ती कामीदेखील आली. 11 ऑगस्ट रोजी अमितने त्याच्या एका नातेवाईकाला फोन केला. हा फोन कॉल पोलिसही ऐकत होते. याच फोनवरून पोलिसांना अमितचे लोकेशन लगेच कळले. तात्काळ नागपूर आणि जबलपूर पोलिसांचे पथक घटनास्थळी पोहोचले आणि त्यांनी अमितला अटक केली.

हिरण नदीत सनाच्या मृतदेहाचा शोध सुरू

सनाच्या बेपत्ता होण्यापासून ते गाडीच्या डिक्कीत रक्ताचे नेमके थेंब कसे आले याबाबत फक्त तोच माहिती देऊ शकणार होता. तो बोलू लागला. कोडे सुटू लागले पण काही गोष्टी अद्यापही स्पष्ट नव्हत्या. अमित साहूने तोंड उघडताच तात्काळ पोलिसांचे पथक जबलपूरच्या प्रसिद्ध हिरण नदीजवळ पोहोचले. टीममध्ये काही पोहणारे आणि काही पोलीस होते. हे सर्वजण मिळून 2 ऑगस्टपासून बेपत्ता असलेल्या सना खानचा शोध घेत होते. आता प्रश्न असा होता की, सना त्या हिरण नदीपर्यंत कशी पोहोचली?

मित्रांच्या मदतीने अमितने मृतदेह दिलेला नदीत फेकून

अमितच्या म्हणण्यानुसार, त्याचे आणि सनाचे लग्न झाले हे खरे आहे. सनाने त्याला 50 लाख रुपयेही दिले होते. मात्र, काही कारणास्तव हॉटेलचे काम सुरू होऊ शकले नव्हते. नंतर सनाने त्याच्याकडे पैसे परत मागायला सुरुवात केली. यावरून दोघांमध्ये वारंवार भांडणे होत होती. 2 ऑगस्ट रोजी सना जबलपूर येथील त्याच्या घरी आली होते. इथेही दोघांमध्ये पुन्हा पैशावरून भांडण झाले होते. या भांडणात अमितने सना हिच्या डोक्यात काठीने वार केला. ज्यामध्ये सनाचा मृत्यू झाला.

यानंतर अमितने त्याच्या दोन मित्रांना सनाच्या मृत्यूची माहिती दिली. त्यानंतर दोन्ही मित्रांनी मिळून मृतदेह त्याच्या गाडीत टाकला. त्यानंतर तो गाडी हिरण नदीकडे घेऊन गेला. त्यांच्या घरापासून हिरण नदी सुमारे 45 किमी दूर होती. या भागात 2 ऑगस्ट सकाळपासून मुसळधार पाऊस पडत होता. हिमाचल आणि पंजाबमध्ये पूर आला होता त्यामुळे हिरण नदीला देखील उधाण आलं होतं. पाण्याचा प्रवाह खूप वेगवान होता.त्यामुळे त्यांनी सनाचा मृतदेह नदीत फेकला आणि तिघेही परतले.

सनाचा मृतदेह शोधणे कठीण

अमितच्या या जबाबानंतर पोलीस काही पोहता येणाऱ्या लोकांना घेऊन हिरण नदीवर पोहोचले. मात्र, अनेक दिवस शोध घेऊनही सनाचा मृतदेह सापडला नाही. ऑगस्टच्या पहिल्या आठवड्यात हिरण नदीतील पाण्याचा प्रवाह पाहता आता मृतदेह सापडण्याची फारशी आशा नसल्याचे खुद्द पोलिसांचेच मत आहे.

अमितला खुनी सिद्ध करणे होते अवघड

आता मृतदेह न मिळाल्याने पोलिसांची विचित्र कोंडी झाली होती. खुन्याची नुसती कबुली देऊन तो खुनी असल्याचे सिद्ध होऊ शकत नाही, हे दोन्ही राज्यातील पोलिसांना चांगलेच ठाऊक होती. पोलीस कोठडीत दिलेल्या जबानीला कोर्टात काही अर्थ नसतो. अमितने न्यायालयात जबाब फिरवला तर मृतदेहाशिवाय खून सिद्ध करणे पोलिसांना कठीण होतं. अशा स्थितीत पोलिसांची दिशाभूल करण्यासाठी अमितने मुद्दाम हिरण नदीचे नाव घेतले असावे, पण मृतदेह इतरत्र कुठेतरी लपवून ठेवला असावा, अशीही शंका उपस्थित होत आहे.

हरदा जिल्ह्यात एका विहिरीत आढळला महिलेचा मृतदेह

आता योगायोगाने 9 ऑगस्ट रोजी जबलपूरजवळील हरदा जिल्ह्यातील एका शेतातील विहिरीतून एक मृतदेह सापडला. मृतदेह एका तरुणीचा होता. मृतदेह हरदा जिल्हा रुग्णालयाच्या शवागारात ठेवण्यात आला . दुसरीकडे हरदा पोलिसांनाही सनाची कहाणी माहीत होती. हरदा पोलिसांनी जबलपूर पोलिसांना या बेवारस मृतदेहाची माहिती दिली. जबलपूर पोलीस शवागारात पोहोचले. यानंतर सनाचा भाऊ मोहसीन यालाही शवागारात बोलावले. जेणेकरून तो मृतदेह ओळखू शकेल. मात्र मोहसीनने मृतदेह पाहातच नकार दिला. ही सना नसल्याचे त्याने पोलिसांना सांगितले..

सनाचा मृतदेह कुठे आहे?

तसे, जबलपूर पोलिसांचाही गोंधळ उडाला. अमितचे म्हणणे खरे असेल तर त्याने मृतदेह हिरण नदीत फेकून दिला होता. मग नदीतून वाहणारा मृतदेह शेतातील विहिरीपर्यंत कसा पोहोचेल? आता एकंदरीत गोष्ट अशी आहे की जवळजवळ बहुतेक कोडी सोडवली गेली आहेत. पण सर्वात महत्त्वाचे कोडे अजूनही सुटलेले नाही. आणि जर सनाचा खून खरोखरच झाला असेल तर पोलिसांना तिचा मृतदेह कधी सापडेल? जर मृतदेहच सापडला नाही तर या खून प्रकरणाचे भवितव्य काय? अशी आता चर्चा सुरू सर्वत्र सुरू आहे.