पुणे हादरले, 23 वर्षांपूर्वीच्या वडिलांच्या खुनाचा घेतला सूड; 28 वार करून हत्या, धक्कादायक उलगडा

Pune Crime News : पुण्यातील कात्रज परिसरात नुकत्याच घडलेल्या हत्येच्या प्रकरणाचा तपास करताना पोलिसांसमोर तब्बल 23 वर्षांपूर्वीच्या एका खुनाशी संबंधित धक्कादायक घटनाक्रम उघड झाला आहे. शिंदेवाडी परिसरात 11 तारखेला रात्री साडेआठच्या सुमारास संजय बाबूराव कडू देशमुख (वय 40) यांची धारदार शस्त्राने तब्बल 28 वार करून हत्या करण्यात आली होती. सुरुवातीला अज्ञात आरोपींविरुद्ध गुन्हा दाखल करण्यात आला. त्यानंतर राजगड पोलिस ठाणे, स्थानिक गुन्हे शाखा आणि इतर तपास पथकांनी घटनास्थळाची पाहणी, सीसीटीव्ही फुटेज, प्रत्यक्षदर्शींची माहिती आणि तांत्रिक पुराव्यांच्या आधारे तपास सुरू केला. या तपासादरम्यान सर्वप्रथम मंथन दिनेश वैद्य आणि सौरभ सागर परदेशी यांना ताब्यात घेण्यात आले. त्यानंतर चौकशीतून मिझान गजुद्दीन शेख आणि संदीप बाबूलाल खोरी यांचाही या गुन्ह्यात सहभाग असल्याचे समोर आले. चौघांनाही अटक करण्यात आली असून त्यांनी गुन्ह्याची कबुली दिल्याचे पोलिसांनी सांगितले.