अमोल कोल्हे राष्ट्रवादीपासून दूर जात आहेत? स्टार प्रचारकांच्या यादीतून नाव का वगळलं?

पुणे : गुजरात विधानसभेच्या निवडणुका जाहीर झाल्या आहेत. या निवडणुकांमध्ये राष्ट्रवादीने ताकदीने उतरण्याची तयारी केली आहे. निवडणुकीच्या प्रचारासाठी राष्ट्रवादीकडून ३१ स्टार प्रचारकांची यादी जाहीर करण्यात आली आहे. पण या यादीमधून २०१९ च्या लोकसभा आणि विधानसभा निवडणुकांमध्ये राष्ट्रवादीचे स्टार प्रचारक राहिलेल्या डॉ. अमोल कोल्हे यांना मात्र वगळण्यात आलं आहे. त्यामुळे नव्या चर्चांना उधाण आलं आहे.

या यादीत शरद पवार, सुप्रिया सुळे, अजित पवार, जितेंद्र आव्हाड यांच्यासह राष्ट्रवादीच्या सर्वच मोठ्या नेत्यांची नावं या यादीत टाकण्यात आली आहेत. पण अमोल कोल्हेंना या यादीतून का वगळण्यात आलंय? याचे कुठले राजकीय अर्थ होतात हे आपण समजावून घेऊ.

छत्रपती शिवाजी महाराज आणि छत्रपती संभाजी महाराजांची भूमिका साकारल्याने अभिनेते असलेले डॉ. अमोल कोल्हे घराघरात पोहचले. राजकारणात त्यांची सुरुवात शिवसेनेतून झाली असली तरी पुढे त्यांनी थेट राष्ट्रवादीत प्रवेश करत शिरुर मतदार संघाची लोकसभेची निवडणूक लढवली. यात त्यांनी शिवसेनेच्या शिवाजीराव आढळराव पाटील यांचा पराभव केला.

त्यानंतर झालेल्या विधानसभा निवडणुकांमध्ये ते राष्ट्रवादीचे स्टार प्रचारक होते. राज्यातील विविध भागांमध्ये त्यांनी सभा गाजवल्या. त्यांच्या वक्तृत्वशैलीमुळे त्यांना नेहमीच भाषणांची संधी दिली जात होती. लोकसभेत देखील त्यांनी हिंदीत केलेल्या भाषणांची बरीच चर्चा झाली होती. असं असताना गुजरात सारख्या महत्त्वाच्या राज्याच्या निवडणुकीच्या प्रचारातून त्यांना वगळल्याने अनेक प्रश्न उपस्थित केले जात आहेत.

हे प्रश्न उपस्थित केले जाण्यामागे आणखी एक कारण म्हणजे काही दिवसांमध्ये राष्ट्रवादीच्या कार्यक्रमांना अमोल कोल्हेंची अनुपस्थिती. नुकतचं शिर्डीमध्ये राष्ट्रवादीचे शिबीर पार पडलं. या शिबिराला शरद पवार यांची तब्येत बरी नसताना ते हॉस्पिटलमधून थेट शिबिरात दाखल झाले होते. शिबिरानंतर पुन्हा ते रुग्णालयात दाखल झाले होते. परंतु या शिबिराला अमोल कोल्हे अनुपस्थित होते. त्यामुळे पक्षात अमोल कोल्हे नाराज असल्याच्या चर्चा देखील सुरु झाल्या होत्या.

या अनुपस्थितीवर जेव्हा पत्रकारांकडून अमोल कोल्हे यांना प्रश्न विचारण्यात आले त्यावेळी तब्येत बरी नसल्याची प्रतिक्रिया त्यांनी दिली होती. याबाबत प्रदेशाध्यक्ष जयंत पाटील यांना देखील कळवल्याचं त्यांनी सांगितलं होतं. मात्र ऑक्टोबरमध्ये कोल्हेंनी अमित शहांची दिल्ली येथे भेट घेतली होती. यावेळी देखील कोल्हे भाजपमध्ये जाणार का अशा चर्चा रंगल्या होत्या. परंतु ही भेट कोल्हेंचा शिवप्रताप गरुडझेप या चित्रपटाचे निमंत्रण देण्यासाठी घेतल्याचे सांगण्यात आले होते. आता स्टार प्रचारकांच्या यादीतून त्यांचे नाव काढल्याने खरंच कोल्हे पक्षावर नाराज आहेत का असा प्रश्न विचारला जातोय.