प्रविण दरेकर यांच्याविरोधात पुण्यातील सिंहगड पोलीस ठाण्यात तक्रार दाखल

राष्ट्रवादी काँग्रेसच्या नेत्या रुपाली चाकणकर यांनी स्वत: प्रविण दरेकरांनी केलेल्या वक्तव्याविरोधात पुण्याच्या सिंहगड पोलीस ठाण्यात तक्रार दाखल केली आहे. प्रविण दरेकर यांनी महिलांचा अपमान करणारं वक्तव्य केल्याचा आरोप यावेळी चाकणकर यांनी केला आहे. याबाबतची माहिती स्वत: चाकणकर यांनी आपल्या ट्विटरवरुन दिली आहे.

पाहा यावेळी रुपाली चाकणकर नेमकं काय म्हणाल्या:

‘गेल्या दोन वर्षांपासून म्हणजे कोरोनाच्या कालावधीपासून भाजप हा सातत्याने महाराष्ट्राच्या एकतेला आणि उज्ज्वल परंपरेला नख लावायचं काम करतोय. सातत्याने महाराष्ट्राची बदनामी कशी करता येईल याकडे त्यांचं जास्त लक्ष असतं. यामध्ये वैयक्तिक स्वार्थासाठी अतिशय खालच्या राजकारणाची पातळी भाजपने गाठलेली आहे.’

‘भारतरत्न बाबासाहेब आंबेडकर, स्वर्गीय यशवंतराव चव्हाण असे दिग्गज नेते महाराष्ट्राने देशाला दिले. त्यांनी चांगल्या पद्धतीचं राजकारण देखील केलं. त्यांनी आपल्या आचारविचारातून आणि आपल्या कामातून कायमच दिल्लीत महाराष्ट्राची मान उंचावत ठेवली.’

‘आपण 2014 पासून पाहतोय की, भाजप वैयक्तिक स्वार्थासाठी, कुरघोडीसाठी, सत्तेच्या लालसेसाठी खालच्या पातळीचं राजकारण करत आहे. ते पाहता आतापर्यंत त्यांनी कळस गाठलेला आहे. याचवेळी प्रविण दरेकर यांनी शिरुरमध्ये एक अतिशय अश्लील असं विधान केलं.’

प्रविण दरेकर तुम्ही जनाची नाही तर मनाची लाज राखून महिला भगिनींची माफी मागायला हवी….

कायद्याच्या चौकटीत राहून आम्हा महिलांना न्याय मिळेल या उद्देशाने याबाबत मी पुण्यात FIR दखल केले आहे..(1/2)@maharashtra_hmo @mipravindarekar @CPPuneCity pic.twitter.com/2KQUgieHka

— Rupali Chakankar (@ChakankarSpeaks) September 22, 2021

‘खरं तर समाजात बोलताना महिलांचा अपमान होईल असंच ते वक्तव्य होतं जे प्रविण दरेकर यांनी केलं आहे. तेव्हापासून आतापर्यंत राज्यभरात महिलांनी निषेध व्यक्त केला, त्यावर रोष व्यक्त केला. किमान जनाची नाही पण मनाची असावी… म्हणून तरी दरेकरांनी त्यावर माफी मागणं अपेक्षित होतं पण त्यांनी त्यावर देखील असं वक्तव्य केलं की, या गोष्टीला मी इतकं महत्त्व देत नाही.’

‘म्हणजे महिलांचा अपमान करुन, हेटाळणी करुन उर्मटपणाची प्रतिक्रिया देणं हे त्यांच्या वैचारिक दारिद्रपणाचं लक्षण आहे. म्हणून काल मी स्वत: सिंहगड पोलीस ठाण्यात प्रविण दरेकरांविरोधात एफआयआर दाखल केलेली आहे. त्यामुळे कायद्याच्या चौकटीतून मला न्याय मिळेल अशी खात्री वाटते.’ अशी माहिती चाकणकर यांनी दिली आहे.

प्रविण दरेकरांचं नेमकं वक्तव्य काय होतं?

आद्य क्रांतीवीर राजे उमाजी नाईक यांच्या २३० व्या जयंती निमित्त पुणे जिल्ह्यातील शिरुर तालुक्यात रामोशी समाजाचा मेळावा आयोजित करण्यात आला होता. यावेळी विधान परिषदेचे विरोधी पक्ष नेते प्रवीण दरेकर उपस्थित होते. रामोशी समाजाला पुढील काळात लोकप्रतिनिधी देणार असल्याचे सांगत दरेकर यांनी राष्ट्रवादी काँग्रेससह सत्ताधारी महाविकास आघाडी सरकारविरुद्ध चौफेर टोलेबाजी केली होती.

घाण तोंडाचे प्रविण दरेकर भाजपसारख्या चांगल्या लोकांच्या पक्षामधे कसे ?-सुरेखा पुणेकर

शिरुर मधील लावणी कलाकार सुरेखा पुणेकर राष्ट्रवादी काँग्रेसमध्ये प्रवेश करणार होत्या. त्यांच्या याच प्रवेशाबाब बोलत असताना दरेकर यांनी त्यांचं नाव न घेता राष्ट्रवादी काँग्रेसवर टीका केली होती. ‘राष्ट्रवादी काँग्रेस हा रंगलेल्या गालाचे मुके घेणारा पक्ष आहे.’ अशी टीका त्यांनी केली होती. ‘या पक्षाला गरीबांकडे पाहण्यासाठी वेळ नाही. सुभेदार,कारखानदार,बँका,आणि उद्योगपतींचा हा पक्ष आहे.’ असा त्यांनी यावेळी आरोप केला होता.