रियाज काझींकडून अँटिलीया प्रकरणातले काही पुरावे नष्ट करण्याचा प्रयत्न – NIA ला संशय

विक्रोळीच्या कन्नमवार नगर परिसरातील एका दुकानात रियाज काझी आत जात असताना सीसीटीव्ही फुटेजमध्ये कैद झाले आहेत. सीसीटीव्हीत दिसत असल्याप्रमाणे रियाज काझी या दुकानात गेल्यानंतर लगेच बाहेर पडत आहेत. विक्रोळीमधलं हे दुकान तुषार कदम नावाचा माणूस चालवतो, सध्या तुषार कदम मुंबईबाहेर असल्याचं कळतंय. कदम यांना ‘मुंबई तक’ ने रियाज काझी यांच्याविषयी विचारलं असता ते माझ्या दुकानात फक्त चौकशीसाठी आले होते, याव्यतिरीक्त मला याविषयी काहीही माहित नसल्याचं सांगितलं. NIA च्या सुत्रांनी दिलेल्या माहितीनुसार बंटी रेडीयम शॉपमधल्या सीसीटीव्हीचं DVR आणि रजिस्टर CIU च्या पथकाने पुरावे नष्ट करण्यासाठी ताब्यात घेतलं होतं.

NIA चं सर्च ऑपरेशन, मिठी नदीत सापडला हरवलेला DVR

API रियाज काझी यांची NIA ने याआधी अनेकदा चौकशी केली आहे. विक्रोळीच्या कन्नमवार भारात कदम यांच्या दुकानाची जागा ही या प्रकरणात महत्वाची मानली जात आहे. कारण १७ फेब्रुवारीला ज्यावेळी मनसुख यांच्या स्कॉर्पिओ गाडीत हायवेवर जेव्हा बिघाड झाला होता तो बिघाड कदम यांच्या दुकानाजवळच झाला होता. NIA च्या अधिकाऱ्यांच्या मते ही गाडी गायब व्हायच्या आधी विक्रोळीच्या याच दुकानातून बनावट नंबरप्लेट बनवण्यात आल्या. ज्यानंतर ही स्कॉर्पिओ वाझेंच्या ठाणे येथील साकेत कॉम्प्लेक्स परिसरात सापडली होती.

सचिन वाझेंच्या अडचणी वाढल्या, विश्वासू सहकारी रियाझ काझी माफीचा साक्षीदार होणार?

रियाज काझी यांनी साकेत सोसायटीला लेटर देऊन सीसीटीव्हीचा DVR आपल्या ताब्यात घेतला होता. पुरावे नष्ट करण्यासाठी वाझे आणि त्यांच्या पथकाने हे काम केल्याचा NIA ला संशय आहे. हाच DVR NIA ला मिठी नदीच्या सर्च ऑपरेशनमध्ये सापडल्याचं बोललं जात आहे. दरम्यान रियाज काझी यांनी CIU मधून Local Arms Unit मध्ये बदली करण्यात आली आहे. या प्रकरणावर काझी यांची बाजू जाणून घेण्याचा आम्ही प्रयत्न केला, पण त्यांनी यावर काहीही न बोलणं पसंत केलं.