अमरावतीतल्या वाढत्या रूग्णसंख्येमागं इन्शुरन्स कंपन्या आणि खासगी दवाखाने यांची मिलिभगत कारणीभूत असल्याचा खळबळजनक आरोप जिल्हा परिषद सदस्य प्रकाश साबळे यांनी केलाय. कोरोनाच्या या वाढत्या संख्येनं अमरावतीची बदनामी होत असल्याचा दावाही साबळेंनी मुंबई तकशी बोलताना केला.
वाढत्या रूग्णसंख्येमुळे संपूर्ण देशाचं लक्ष अमरावतीतकडे वेधलं गेलंय. अमरावतीत कोरोनाचा एवढ्या मोठ्या प्रमाणात प्रादुर्भाव का झाला, याचं शोध प्रशासनाकडून घेतला जातोय. अशात जिल्हा परिषद सदस्यानेच खळबळजनक आरोप केल्यानं प्रकरणाला नवंच वळण मिळालंय. प्रकाश साबळे यांनी जिल्हा परिषदेच्या सर्वसाधारण सभेतही रूग्णसंख्या वाढीचा मुद्दा मांडला.
मुंबई तकशी बोलताना प्रकाश साबळे म्हणाले, प्रायव्हेट लॅबधारक इन्शुरन्सच्या फायद्यासाठी कोरोनाचा पॉझिटिव्ह रिपोर्ट देत आहेत. त्यामुळे नाहक अमरावतीची संपूर्ण राज्यात आणि देशात बदनाम होतेय. आणि निष्कारण लॉकडाउन लावून सर्वसामान्यांसह गरीब हातावर असणाऱ्या लोकांना याचा त्रास होतोय.
प्रकाश साबळे यांनी या प्रकरणी ज्यांचे आरटीपीसीआर चाचणीचे रिपोर्ट पॉझिटिव्ह आलेत त्यांची अँटीबॉडी टेस्ट करावी. आणि अँटीबॉडी टेस्ट निगेटिव्ह आल्यास संबंधितांवर कठोर कारवाई करण्याची मागणी केलीय.
प्रकाश साबळे यांच्या या आरोपानं खळबळ उडालीय. त्यांनी जिल्हा परिषदेच्या सर्वसाधारण सभेतही हा मुद्दा मांडला. यावर जिल्हा परिषदेचे मुख्य कार्यकारी अधिकारी अमोल येडगे यांनी याप्रकरणी प्रकाश साबळे यांना पुरावे सादर करण्यासं सांगितलं.
मुंबई तकशी बोलताना अमोल येगडे म्हणाले, त्यासाठी २ दिवसांची मुदत दिली असून त्यानंतर या संपूर्ण प्रकरणाची सखोल चौकशी करण्याचं आश्वासन त्यांनी मुंबई तकशी बोलताना दिलं. प्रकाश साबळे यांनी सर्वसाधारण सभेत हा मुद्दा उपस्थित केला.
यावरून त्यांनी चौकशी करण्याची मागणी केली. पण याबद्दल त्यांनी कोणताही पुरावा आमच्याकडे दिला नाही. तक्रार दिली नाही. येत्या २ दिवसांत पुरावे द्यावे, असं पत्र आम्ही साबळेंना दिलंय. पुरावे दिल्यानंतर संपूर्ण प्रकरणाची चौकशी करण्यात येईल.
मुंबई तकने इन्शुरन्स कंपन्यांच्या स्थानिक प्रतिनिधींशी संवाद साधला. तेव्हा त्यांनी कॅमेऱ्यासमोर प्रतिक्रिया देण्यास नकार दिला. पण गेल्या काही काळात कोरोना विमाच्या सेटेलमेंटसाठीच्या फाईल वाढल्याचं त्यांनी सांगितलं.
दुसरीकडे जिल्हाधिकाऱ्यांनीही या प्रकरणी चौकशीचे आदेश दिलेत. पण त्याचवेळी अमरावतीत कोरोनाचा प्रादुर्भाव नाही, हा दावाही त्यांनी फेटाळून लावला. कोरोना चाचण्यांचा संपूर्ण डेटा हा ऑनलाईन पद्धतीने नोंदवला जातो. त्याची कोणाला खातरजमा करायची असेल तर त्यांनी आरोग्य विभागाशी संपर्क साधावा, असं आवाहनही जिल्हाधिकाऱ्यांनी प्रसिद्धीपत्रक काढून केलंय.
