बिलावरून रामायण! सदाभाऊ खोतांचा थेट पवारांवर गंभीर आरोप! 'त्या' ढाबा मालकाचं म्हणणं काय?

बिल देण्याची मागणी करत सदाभाऊ खोत यांची गाडी अडवल्याचा प्रकार घडला. या घटनेनंतर खोत यांनी पवार कुटुंबाचा हल्ला करण्याचा डाव असल्याचा आरोप केला. तर दुसरीकडे त्या ढाबा मालकानेही खुलासा केलाय...
बिलावरून रामायण! सदाभाऊ खोतांचा थेट पवारांवर गंभीर आरोप! 'त्या' ढाबा मालकाचं म्हणणं काय?

सांगोल्यात माजी आमदार सदाभाऊ खोत यांची गाडी अडवत एका ढाबा मालकाने उधारी मागितली. हा प्रकार मोबाईलमध्ये कैद झाला आणि महाराष्ट्रभर पसरला. जेवणाच्या उधारीच्या प्रकरणावर बोलताना सदाभाऊ खोत यांनी थेट पवार कुटुंबालाच यात ओढलं आहे. दुसरीकडे ढाबा मालकाने सगळा घटनाक्रम सांगत जोपर्यंत उधारी मिळत नाही, तोपर्यंत प्रत्येक गोष्टीला सामोर जाण्यास तयार असल्याचा इशारा सदाभाऊ खोत यांना दिला आहे.

सदाभाऊ खोतांचं म्हणणं काय?

या प्रकारावर बोलताना सदाभाऊ खोत म्हणाले, "मी सोलापूर जिल्ह्यात आलो होतो. सांगोला पंचायत समितीला भेट द्यायला जात असताना, एक अनोळखी व्यक्ती माझ्यासमोर आली. माझे पैसे द्या अशी मागणी ती व्यक्ती करू लागली. मी प्रेमाने त्या व्यक्तीला विचारलं की, पैसे कशाचे आहेत? ती व्यक्ती म्हणाली हॉटेलचे बिल आहे. २०१४चं बिल आहे. तर ती व्यक्ती म्हणाली लोक जेवले होते. त्यावर मी त्याला विचारलं की, लोकांना कोण घेऊन आलं होतं. त्यावर ती व्यक्ती म्हणाली की तुमचा मुलगा घेऊन आला होता."

"मी मुलाला विचारलं, तर तो म्हणाला मी त्याला कधी बघितलं नाही. माझे कार्यकर्ते तळहातावर चटणीभाकर घेऊन फिरले. माझ्या कार्यकर्त्यांवर आणि शेतकऱ्यांवर माझा विश्वास आहे. कोण-कोण जेवायला आलं होतं म्हटल्यावर त्याच्या डायरीमध्ये नावं होती. ती डायरी बघितल्यावर गावातील लोकांची नावं होती," असं त्यांनी सांगितलं.

"आम्ही त्या निवडणुकीत जेवणाचा रतीब घातलेला नव्हता. नंतर त्याचं नाव अशोक शिनगारे असल्याचं मला समजलं. त्याच्या गावातून मला फोन आले. त्या गावातील लोकांनी मला सांगितलं की, हा मोठा गुन्हेगार आहे. कर्नाटकात त्याने सोन्या-चांदीच्या दुकानावर दरोडा टाकला होता. मी त्याच्याबद्दलची माहिती घेतली, तर त्याच्यावर सात-आठ गुन्हे निघाले."

"हा दरोडेखोर आहे. हा वाळूमाफिया आहे. याच्यावर अनेक गुन्हे आहेत, असं मी पोलिसांना सांगितलं. त्याची कसून चौकशी करा. त्याच्यावर सरकारी कामात अडथळा आणल्याप्रकरणी गुन्हा दाखल करा असं मी पोलिसांना सांगितलं. त्यानंतर पोलीस माझ्या कार्यकर्त्यांची समजूत काढत आहेत. तो रडतोय. त्याचं चुकलंय. त्याला माफ करा. एका राष्ट्रवादीच्या बड्या नेत्याचा पोलिसांना फोन," असा दावा खोत यांनी केला.

"त्याला सांगितलं गेल्याप्रमाणे तो बोलत होता. त्याला विचारलं किती पैसे द्यायचे तो सांगत नव्हता. काही लोकं त्यांनी हल्ला करण्यासाठी ठेवली होती, पण मी लवकर निघून आल्यामुळे त्यांचं प्लानिंग फसलं. मग या कारणामुळे हल्ला केला म्हणून राज्यभर कांगावा करायचा, असा डाव लाल टमाट्यासारखा गाल असलेल्या एका माणसानं केला होता. तो डाव फसला."

"त्या व्यक्तीवर मोक्का लावावा अशी मागणी मी करणार आहे. राष्ट्रवादी काँग्रेस आणि पवार कुटुंब आम्हाला संपवण्यासाठी प्रयत्न करत आहे. पवार कुटुंबियांकडून माझ्या जिवाला धोका आहे. असे हल्ले माझ्यावर झालेले आहेत. मी गृहमंत्र्यांकडे याबद्दलची तक्रार करणार आहे," असं सदाभाऊ खोत म्हणाले.

ढाब्याचे मालक काय म्हणाले?

सदाभाऊ खोत यांच्याकडे उधारी मागणारे ढाब्याचे मालक अशोक शिनगारे यांनी त्यांची बाजू स्पष्ट केली. "२०१४ साली सदाभाऊ खोत म्हाडा मतदारसंघातून उभे राहिले होते. त्यांचा मुलगा सागर खोत माझ्याकडे आला होता. त्यावेळी मी शेतकरी संघटनेचं काम करत होतो. त्यावेळी ते आले होते. इथे आल्यानंतर ते मला म्हणाले की, म्हाडा मतदारसंघातून भाऊ (सदाभाऊ खोत) उभं राहणार आहेत. तुमचं नाव चांगलं आहे. आम्हाला मदत करा," असं शिनगारे म्हणाले.

"सागर आणि मी खाटावर बसलो. त्यांचा पाहुणचार केला. त्यानंतर जाता-जाता तो म्हणाला की, आमचे जर कार्यकर्ते आले, तर त्यांच्या जेवणाची व्यवस्था करा. तुमचं बिल द्यायला आम्ही तयार आहोत. तुम्हाला आम्हाला मदत करावी लागतेय, असं तो (सागर) म्हणाला."

"एका महिन्यानंतर मी सागरला फोन केला. त्यांनी फोन उचलला नाही. त्यानंतर मी भाऊंना (सदाभाऊ खोत) फोन केला. त्यावेळी सदाभाऊ खोत म्हणाले, मी आज आमदार, मंत्री आहे. तू माझे पीए किंवा मुलाला फोन करायचा. तू थेट मला कशाला फोन करतो. नंतर त्यांनी फोन कट केला."

"नंतर मी सातत्याने संपर्क करण्याचा प्रयत्न केला. त्यांनी मला उत्तर दिलं नाही. एकदा सांगोल गेस्ट हाऊसला आले होते. मी तिथं जायच्या आधी ते निघून गेले. त्यानंतर ते काल (१६ जून) सांगोल्यात येणार असल्याचं मला कळलं. त्यानंतर मी पंचायत समितीमध्ये जाऊन सदाभाऊ खोत यांची गाडी अडवली. मी त्यांना सांगितलं की, आधी बिल द्या आणि कार्यक्रमाला जा."

"मी बिल मागितल्यानंतर त्यांनी उडवाउडवीची उत्तरं दिली. ही चांगली पद्धत नाही, असं त्यांचे कार्यकर्तेही मला बोलायला लागले. मी त्यांना सांगितलं की ९-१० वर्षांपासून अडचणीत आहे. मी जमीन विकली. मी अडचणीत असून, तुम्ही मला पद्धत बरोबर नाही, असं म्हणता आहात. मी त्यांना सांगितलं की हीच पद्धत बरोबर आहे. नंतर त्यांनी मला पोलिसांच्या ताब्यात दिलं," असं त्यांनी सांगितलं.

"त्यांचं असं मत आहे की, राष्ट्रवादीने हा पराक्रम केलाय. पण प्रत्यक्षात माझा आणि राष्ट्रवादीचा काहीही संबंध नाही. मी शेतकरी संघटनेच्या चळवळीतील कार्यकर्ता आहे. हे सगळ्या जिल्ह्याला माहितीये. इतका खोटारडा नेता मी पहिल्यांदा बघतोय. त्यांचं असं मत आहे की माझं हॉटेलचं नाही. मला सांगायचं आहे की, माझं हॉटेल येऊन बघा. त्यांनी त्यांच्या मुलाला घेऊन यावं. मी त्याला काय उत्तर द्यायचं ते देईन. जोपर्यंत बिल मिळत नाही, तोपर्यंत प्रत्येक गोष्टीला सामोरं जाण्यास मी तयार आहे," असा इशारा शिनगारे यांनी दिला आहे.

Related Stories

No stories found.
Mumbai Tak
www.mumbaitak.in