संदीपान भुमरेंकडे औरंगाबादची जबाबदारी; 22 वर्षानंतर मिळाली स्थानिक मंत्र्याला संधी

1995 मध्ये युती सरकार असताना तत्कालीन आमदार चंद्रकांत खैरे यांच्याकडे औरंगाबादच्या पालकमंत्रीपदाची जबाबदारी देण्यात आली होती.
Sandipan Bhumare
Sandipan Bhumare Mumbai Tak

गेल्या अनेक दिवसांपासून रखडलेली शिंदे सरकारमधील पालकमंत्र्यांची यादी अखेर रविवारी जाहीर करण्यात आली आहे. ज्यात पैठण विधानसभा मतदारसंघाचे आमदार तथा शिंदे सरकारमध्ये रोजगार हमी योजना मंत्री असलेले संदिपान भुमरे यांची औरंगाबादच्या पालकमंत्रीपदी वर्णी लागली आहे. विशेष म्हणजे तब्बल 22 वर्षानंतर औरंगाबादकरांना स्थानिक पालकमंत्री मिळाले आहे. त्यामुळे शिंदे गटातील कार्यकर्त्यांनी जल्लोष साजरा करत भूमरेंच्या निवडीचं स्वागत केलं आहे.

औरंगाबाद मंत्र्यांचा जिल्हा

एकट्या औरंगाबाद जिल्ह्यात शिंदे आणि फडणवीस सरकारमधील 3 मंत्रिपद देण्यात आले आहेत. त्यामुळे मंत्र्यांचा जिल्हा म्हणून देखील मागच्या काही महिन्यांपासून औरंगाबादला बोललं जातंय. भाजपचे औरंगाबाद पूर्वचे आमदार अतुल सावे यांना सहकारमंत्रीपद देण्यात आलं होतं. तर शिंदे गटाचे सिल्लोडचे आमदार अब्दुल सत्तार यांना कृषिमंत्री तर संदीपान भुमरेंना रोहयो मंत्रीपद देण्यात आलं होत. त्यामुळे औरंगाबाद जिल्ह्याचा पालकमंत्री कोण होणार याकडे लक्ष लागलं होतं.

युतीच्या सरकारमध्ये चंद्रकांत खैरे यांच्याकडे होती पालकमंत्रीपदाची जबाबदारी

यापूर्वी 1995 मध्ये शिवसेना-भाजप शिवशाही सरकार असताना तत्कालीन आमदार चंद्रकांत खैरे यांच्याकडे औरंगाबादच्या पालकमंत्रीपदाची जबाबदारी देण्यात आली होती. मात्र त्यानंतर पुढे कधीच औरंगाबादला स्थानिक पालकमंत्री मिळाला नाही. मात्र रविवारी पालकमंत्र्यांची घोषणा करण्यात आली आणि भुमरेंना संधी मिळाली. भुमरे यांच्या निमित्ताने तब्बल 22 वर्षांनी औरंगाबादकरांना स्थानिक पालकमंत्री मिळाला आहे. त्यामुळे भुमरेंकडे औरंगाबादकर अपेक्षा लावून आहेत.

संदीपान भुमरेंचं होणार जल्लोषात स्वागत

मंत्री संदिपान भुमरे यांना औरंगाबादचे पालकमंत्री पद मिळाल्याने त्यांच्या समर्थकांमध्ये आनंदाचे वातावरण आहे. तर भुमरे रविवारी औरंगाबादमध्ये येणार असल्याने त्यांच्या स्वागताची जय्यत तयारी शिंदे गटाकडून करण्यात आली आहे. शहरात दाखल होणाऱ्या भुमरे यांचं चिकलठाणा भागातील केंब्रिज चौकात भव्य असा सत्कार केलं जाणार आहे. यासाठी कार्यकर्त्यांना उपस्थित राहण्याचे आवाहन शिंदे गटाकडून करण्यात आले आहे.

अब्दुल सत्तारांकडे हिंगोलीची जबाबदारी

औरंगाबाद जिल्ह्याच्या पालकमंत्रीपदासाठी संदिपान भुमरे यांच्या बरोबरच कृषिमंत्री अब्दुल सत्तारांच्या नावाची सुद्धा चर्चा होती. मात्र औरंगाबादची जबाबदारी भुमरे यांच्याकडे देण्यात आली असून, सत्तार यांना हिंगोली जिल्ह्याची जबाबदारी देण्यात आली आहे. विशेष म्हणजे अब्दुल सत्तार यांना जालना जिल्ह्याच्या पालकमंत्रीपदी संधी मिळणार असल्याची सुद्धा चर्चा झाली होती. मात्र जालन्याच्या पालकमंत्रीपदी भाजप आमदार अतुल सावे यांची वर्णी लागली आहे.

Related Stories

No stories found.
Mumbai Tak
www.mumbaitak.in