असं काय घडलं की, राहुल गांधींनी ‘फ्लाइंग किस’ दिला? लोकसभेत झाला प्रचंड गोंधळ

तर झालं असं की बुधवारी (9 ऑगस्ट) लोकसभेत अविश्वास ठरावावर दुसऱ्या दिवशीही चर्चा सुरू होती. यावर बोलण्यासाठी राहुल गांधीही सभागृहात पोहोचले. भाषण संपल्यानंतर ते सभागृहातून बाहेर पडत असताना त्यांचे काही कागदपत्रं जमिनीवर पडले.

राहुल गांधी फ्लाईंग किस… लोकसभेत काय घडलं?

सूत्रांनी दिलेल्या माहितीनुसार, राहुल गांधी हे कागदपत्रं उचलण्यासाठी खाली वाकले, तेव्हा भाजप खासदार हसायला लागले. त्यानंतर राहुल गांधींनी ट्रेझरी बेंचकडे फ्लाइंग किस दिला आणि हसत निघून गेले.

वाचा >> Rahul Gandhi: ‘रावणाप्रमाणेच मोदीजी सुद्धा दोन जणांचं…’, राहुल गांधींनी मोदींना भयंकर डिवचलं!

दरम्यान, ही घटना कॅमेऱ्यात कैद झाली नाही. पण, तिथे उपस्थित लोकांच्या म्हणण्यानुसार हा सर्व प्रकार त्यांच्या डोळ्यासमोर घडला. त्यावेळी केंद्रीय मंत्री स्मृती इराणी यांचे भाषण सुरू होते. भाषणादरम्यान ही बाब त्यांच्यापर्यंत पोहोचली आणि यावर सभागृहात भाष्य केले.

स्मृती इराणींनी गांधींवर चढवला हल्ला

लोकसभेत बोलताना स्मृती इराणी यांनी राहुल गांधींवर महिला खासदारांना फ्लाइंग किस दिल्याचा आरोप केला आणि म्हणाल्या, “त्यांनी (राहुल) बाहेर पडताना स्त्रीविरोधी स्वभावाची लक्षणे दाखवली. महिला खासदारांना केवळ असभ्य व्यक्तीच फ्लाइंग किस देऊ शकते. या सभागृहाने असे चरित्रहीन आचरण पाहिलेले नाही.” यासोबतच स्मृती इराणी यांनी राहुल गांधी यांच्यावर महिलांचा अपमान केल्याचा आरोपही केला आहे.

काय म्हणाल्या भाजपच्या महिला खासदार?

केंद्रीय कृषिमंत्री आणि भाजप खासदार शोभा करंदलाजे यांनी ‘फ्लाइंग किस वादावर’ बोलताना राहुल गांधींचे वर्तन ‘अयोग्य’ असल्याचे म्हटले आणि लोकसभा अध्यक्षांकडे तक्रार केली. यावेळी त्यांच्यासोबत अनेक महिला खासदार उपस्थित होत्या. या सर्वांची स्वाक्षरी असलेल्या तक्रारीवर कडक कारवाईची मागणी करण्यात आली आहे.

वाचा >> Rahul Gandhi Speech : “माझी एक आई इथे बसलीये, दुसरीची मणिपूरमध्ये हत्या केली”

शोभा करंदलाजे म्हणाल्या, “सर्व महिला सदस्यांना फ्लाइंग किस देऊन राहुल गांधी निघून गेले. हे निव्वळ गैरवर्तन आहे. हे एका सदस्याचे अयोग्य आणि असभ्य वर्तन आहे. भारताच्या संसदेच्या इतिहासात असे कधीच घडले नाही. हे कसले वर्तन आहे? ते कोणत्या प्रकारचे नेते आहेत? म्हणून, आम्ही लोकसभा अध्यक्षांकडे याबाबत सीसीटीव्ही फुटेज घेऊन त्याच्यावर कारवाई करण्याची तक्रार केली आहे.”

याशिवाय भाजप खासदार पूनम महाजन यांनी राहुल गांधी यांना तातडीने सभागृहातून बडतर्फ करावे, असे म्हटले तर खासदार सुनीता दुग्गल म्हणाल्या की, राहुल गांधी पाश्चिमात्य संस्कृतीत वाढले असल्याने असे दिसले.

वाचा >> Nitin Desai : ‘आराम केला अन् दुसऱ्या मजल्यावर जाऊन घेतला गळफास’, देसाईंच्या मित्राने सांगितली स्टोरी

या घटनेबाबत माजी केंद्रीय मंत्री रविशंकर प्रसाद यांनीही राहुल गांधी यांच्यावर जोरदार हल्ला चढवला. ते म्हणाले, “राहुल गांधींचे संसदेतील वर्तन शालिनतेच्या विरोधात आहे. संसदेत कोणी फ्लाइंग किस देते का?”

राहुल गांधी यापूर्वी कधी आले चर्चेत

जुलै 2018 मध्ये अविश्वास प्रस्तावावरील चर्चेदरम्यान राहुल गांधी लोकसभेत पंतप्रधान नरेंद्र मोदी यांच्या आसनाजवळ गेले होते आणि त्यांना मिठी मारली होती.

एकदा राहुल गांधींनी लोकसभेत बसलेल्या ज्योतिरादित्य शिंदेंना डोळा मारला होता. यावरही बरीच चर्चा झाली होती. त्यावेळी शिंदे काँग्रेसमध्ये होते.