Baramati: शरद पवारांकडून अजितदादांना जेवणाचं निमंत्रण, पवार नव्या गुगली दादांची विकेट घेणार?

2 मार्च 2024 रोजी राज्य शासनाच्या वतीने बारामतीमध्ये नमो महारोजगार मेळाव्याचं आयोजन करण्यात आलं आहे. ज्या कार्यक्रमाला खुद्द मुख्यमंत्र्यांसह दोन्ही उपमुख्यमंत्री हे हजर राहणार आहेत. पण हीच संधी साधून शरद पवारांनी एक नवी राजकीय खेळी खेळली आहे. ती म्हणजे मुख्यमंत्री एकनाथ शिंदे यांच्यासह अजित पवार आणि देवेंद्र फडणवीस या दोघांनाही आपल्या बारामतीमधील खासगी निवासस्थानी थेट जेवणाचं आमंत्रण दिलं आहे. 

शरद पवारांची कृती ही कधीही साधी-सरळ नसते. ती असते कायमच बुद्धीबळातील उंटासारखी तिरकी... आणि आता देखील तशीच चाल शरद पवारांनी खेळली आहे.

हे ही वाचा >> NCP ची बँक खाती ताब्यात, मुख्यालयावरही अजितदादांचा दावा

सर्वात आधी शरद पवारांनी 2 मार्चचा शासकीय कार्यक्रमाला आपल्याला आणि खासदार सुप्रिया सुळे यांना हजर राहायला आवडेल असं म्हणत थेट पत्रत मुख्यमंत्र्यांना दिलं आहे. एवढंच नव्हे तर एकनाथ शिंदे हे मुख्यमंत्री झाल्यापासून पहिल्यांदाच बारामतीला येत आहेत त्यामुळे त्यांनी अतिथ्य भोजनाचा आस्वाद घ्यावा अशी विनंतीही शरद पवारांनी यावेळी केली आहे. याबाबत एक पत्रच पवारांनी मुख्यमंत्र्यांना देऊ केलं आहे. वाचा त्या पत्रात नेमकं काय म्हटलं आहे.

शरद पवारांचं ते पत्र जसंच्या तसं... 

शरद पवार
संसद सदस्य (राज्य सभा)

दि. २८ फेब्रुवारी, २०२४

प्रिय मा. मुख्यमंत्री

स.न.वि.वि.

आपण शनिवार, दिनांक ०२ मार्च, २०२४ रोजी बारामती येथे शासकीय दौऱ्यानिमित्त येत असल्याचे समजले. सदर शासकीय कार्यक्रमाप्रसंगी संसद सदस्य नात्याने मला आणि सौ. सुप्रिया सुळे यांना उपस्थित राहायला आवडेल. तसेच उक्त दिनी महारोजगार मेळाव्याचे आयोजन मी संस्थापक अध्यक्ष असलेल्या विद्या प्रतिष्ठान, विद्यानगरी बारामती येथील मैदानात करण्यात येत असल्याने संस्थेचा अध्यक्ष या नात्याने मी आपले संस्थेच्या प्रांगणात यथोचित स्वागत करू इच्छितो. करीता विद्या प्रतिष्ठान, विद्यानगरी, बारामती येथील अतिथी निवासात चहापानासाठी आपणास निमंत्रीत करतो.

आपण मुख्यमंत्री पदी विराजमान झाल्यानंतर बारामती शहरी प्रथमतः येत आहात याचा मला मनोमन आनंद आहे. बारामती येथील 'गोविंदबाग ह्या माझ्या निवासस्थानी अतिथ्य भोजनाचा आस्वाद घ्यावा असे मी आपणास दूरध्वनीवरून निमंत्रण यापूर्वीच दिले आहे. कृपया नमो महारोजगार मेळाव्यानंतर आपण मंत्रीमंडळातील इतर सहकाऱ्यांसह ह्या निमंत्रणाचा देखील आपण स्विकार करावा.

दोन्ही सस्नेह आमंत्रणांचा आपण स्विकार कराल अशी अपेक्षा व्यक्त करतो. धन्यवाद. कळावे,

आपला.
(शरद पवार )

श्री. एकनाथ संभाजीराव शिंदे
माननिय मुख्यमंत्री, महाराष्ट्र राज्य,
मंत्रालय, मुंबई-३२.

प्रतिलिपी - खालील मान्यवरांना विनंती कि आपणास देखील सस्नेह निमंत्रीत करीत असून कृपया निमंत्रणाचा स्विकार करावा.

१. श्री. देवेंद्र गंगाधरराव फडणवीस,
माननिय उपमुख्यमंत्री, महाराष्ट्र राज्य,
मंत्रालय, मुंबई-३२.

२. श्री. अजित अनंतराव पवार
माननिय उपमुख्यमंत्री, महाराष्ट्र राज्य,
मंत्रालय, मुंबई-३२.

शरद पवारांच्या पत्राचा नेमका अर्थ काय?

शरद पवारांनी दिलेल्या या पत्राचे अनेक राजकीय अर्थ निघतात. लोकसभा निवडणूक ही तोंडावर आलेली असताना मुख्यमंत्र्यांनी बारामतीत कार्यक्रम घेतल्याने त्याचा फायदा हा अजित पवारांच्या गटाला होऊ शकतो. पण तो फायदा थेटपणे त्यांना मिळू नये यासाठीच शरद पवार यांनी स्वत:हून कार्यक्रमाला हजर राहण्याची इच्छा व्यक्त करत अजित पवारांचा डाव हाणून पाडण्याचा प्रयत्न केला आहे. 

कार्यक्रमाला मुख्यमंत्री हे जरी प्रमुख असले तरीही शरद पवार यांची उपस्थिती ही महत्त्वाची मानली जाईल. जेणेकरून संपूर्ण बारामतीत आपली नेमकी ताकद किती आहे हेही पवार यानिमित्ताने दाखवून देऊ शकतात. तर अजित पवारांना हा संपूर्ण कार्यक्रम त्यांना हवा तशा पद्धतीने हायजॅक करता येणार नाही.

हे ही वाचा >> Navneet Rana यांना महाराष्ट्र सरकारचा 'सुप्रीम' झटका

याशिवाय जर मुख्यमंत्री एकनाथ शिंदे आणि देवेंद्र फडणवीस, अजित पवार हे जर पवारांच्या घरी जेवणासाठी गेले तर त्याचे वेगवेगळे राजकीय अर्थही निघतील. कारण त्यावेळी बंद दाराआड काय चर्चा होतील याबाबत एक राजकीय संभ्रमाची परिस्थिती नक्कीच निर्माण होऊ शकते. ज्याचा पर्यायाने लोकसभा निवडणुकीत शरद पवारांच्या उमेदवाराला फायदा होऊ शकतो. तर बारामतीच्या राजकारणावर त्याचा मोठा परिणाम होण्याची शक्यता आहे. 

त्यामुळेच शरद पवारांनी मुख्यमंत्र्यांना दिलेलं हे पत्र जेवढं सरळ दिसतंय तेवढं अजिबात नाही एवढं नक्की.. आता पवारांच्या या पत्राला अजित पवार कशा पद्धतीने उत्तर देतात हे पाहणंही तितकंच रंजक ठरणार आहे.