केदार जाधव आहे तरी कोण... नेमका इतिहास काय, भाजपमध्येच का केला प्रवेश?

कोण आहे केदार जाधव?

केदार जाधव याचा जन्म 26 मार्च 1985 रोजी पुण्यातील एका मध्यमवर्गीय कुटुंबात झाला. मराठमोळ्या या खेळाडूने क्रिकेटच्या मैदानावर आपल्या फलंदाजीने आणि अष्टपैलू कौशल्याने नाव कमावले. तो उजव्या हाताचा फलंदाज असून, आवश्यकतेनुसार यष्टीरक्षण आणि उजव्या हाताने ऑफ-स्पिन गोलंदाजीही करत असे. त्याने भारतासाठी आंतरराष्ट्रीय क्रिकेट खेळले असून, महाराष्ट्र क्रिकेट संघाचे प्रतिनिधित्वही केले आहे.

हे ही वाचा>> Eknath Khadse :"बायकांना बोलवायचं, फोन करायचं...", गिरीश महाजनांचे महिला IAS अधिकाऱ्याशी संबंध, शाहांकडे CDR..

केदार जाधवची क्रिकेट कारकीर्द

केदार जाधवने आपल्या क्रिकेट कारकीर्दीची सुरुवात महाराष्ट्रासाठी क्रिकेट खेळून केली. त्याने 16 नोव्हेंबर 2014 रोजी श्रीलंकेविरुद्ध रांची येथे एकदिवसीय आंतरराष्ट्रीय (ODI) सामन्यातून भारतासाठी पदार्पण केले होते. त्यानंतर 17 जुलै 2015 रोजी झिम्बाब्वेविरुद्ध टी-20 आंतरराष्ट्रीय सामन्यातही त्याने पहिला सामना खेळला. त्याला टेस्ट क्रिकेट खेळण्याची संधी मिळाली नाही, परंतु वनडे क्रिकेटमध्ये त्याने आपली छाप पाडली.

वनडे आकडेवारी: केदारने 73 वनडे सामने खेळले, ज्यात त्याने 42.09 च्या सरासरीने 1389 धावा केल्या. यात दोन शतके आणि सहा अर्धशतकांचा समावेश आहे. त्याने पार्ट-टाइम गोलंदाज म्हणून 27 विकेट्सही घेतल्या, त्याची इकॉनॉमी 5.15 इतकी होती.