मुख्यमंत्रिपदाची शपथ घेताच थलपती विजय यांचे 3 मोठे निर्णय, राज्यातील जनतेला खास गिफ्ट

हेही वाचा : उल्हासनगर : बहिणीने आनंदाने प्रेमविवाह केला, पण भावाच्या जातीच्या अहंगंडामुळे सूड उगवला

राज्याच्या आर्थिक स्थितीवर श्वेतपत्रिका निघणार

मुख्यमंत्रिपदाची शपथ घेतल्यानंतर विजय यांनी आपला मोर्चा राजकीय प्रतिस्पर्धी द्रविड मुन्नेत्र कळघम (DMK) कडे वळवला. 2021 ते 2026 या काळातील राज्याच्या आर्थिक स्थितीवर लवकरच श्वेतपत्रिका प्रसिद्ध करण्यात येईल, अशी महत्त्वपूर्ण घोषणा त्यांनी केली. "डीएमके सरकारने आमच्यावर 10 लाख कोटी रुपयांच्या कर्जाचा डोंगर सोडून दिला आहे. मागील सरकारने राज्यावर किती ओझे लादले आहे आणि मला कोणत्या आर्थिक संकटाचा सामना करावा लागत आहे, हे मला जनतेला सांगायचे आहे," असे विजय यांनी स्पष्ट केले. पारदर्शक प्रशासनाचे आश्वासन देताना त्यांनी जाहीरनाम्यातील प्रत्येक शब्द पाळणार असल्याचा पुनरुच्चार केला. तसेच एआयएडीएमकेवर टीका करताना त्यांनी सांगितले की, ते आपली जबाबदारी बंद दरवाजाआड नाही तर पारदर्शकपणे पार पाडतील.

हेही वाचा : 'विजय सरकार'चा शपथविधी, 29 वर्षीय किर्तनासह 9 आमदार होणार मंत्री; एक डॉक्टर तर 3 जण पोस्ट ग्रॅज्युएट

राज्यात पारदर्शक प्रशासन राबवणार, विरोधकांनाही सोबत घेण्याचे आश्वासन

राज्यातील सरकारची स्थिरता आणि कारभारावरून उपस्थित होणाऱ्या शंकांचे निरसन करताना विजय यांनी स्पष्ट केले की, प्रशासनात सत्तेची अनेक केंद्रे नसून ते स्वतः प्रशासनाचे एकमेव प्रमुख असतील. तामिळनाडू विधानसभेत त्यांच्याकडे अत्यल्प बहुमत असून अनेक लहान पक्षांच्या पाठिंब्यावर सरकार टिकून आहे, या पार्श्वभूमीवर त्यांचे हे विधान अत्यंत महत्त्वाचे मानले जात आहे. शिक्षण, अन्नपुरवठा, आरोग्य सेवा आणि महिला सुरक्षा ही आपली मुख्य प्राथमिकता क्षेत्रे राहतील, असे त्यांनी पुन्हा एकदा अधोरेखित केले. प्रशासकीय आराखडा सविस्तरपणे मांडला नसला तरी, लोकांच्या गरजा पूर्ण करण्यासाठी आपले सरकार पूर्ण ताकदीने काम करेल असा विश्वास त्यांनी यावेळी व्यक्त केला.

आपल्या पहिल्याच भाषणात विजय यांनी संयमी भूमिका घेत सर्वांना चकित केले. तामिळनाडूच्या विकास प्रवासात आपल्या टीकाकारांना आणि विरोधकांनाही सोबत घेऊन जाण्याचे आश्वासन त्यांनी दिले. "ज्यांनी माझ्यावर टीका केली आणि माझा अपमान केला, ते देखील माझेच लोक आहेत," असे भावनिक उद्गार त्यांनी काढले. ही भूमिका घेऊन त्यांनी राज्यातील राजकीय कटुता कमी करण्याचा प्रयत्न केला आहे. जनतेचा पाठिंबा आणि संधी मिळाल्यास सर्व आश्वासने पूर्ण करण्याचा प्रयत्न करेन, असे म्हणताच उपस्थित लोकांनी टाळ्यांच्या कडकडाटात त्यांचे स्वागत केले. एका सुपरस्टारपासून ते राज्याचा मुख्यमंत्री बनण्यापर्यंतच्या या प्रवासात विजय यांनी आता प्रशासकीय जबाबदारीचे आव्हान स्वीकारले आहे.