होम
राजकीय आखाडा
गुन्ह्यांची दुनिया
शहर-खबरबात
राशीभविष्य-धर्म
पैशाची बात
फोटो बाल्कनी
हवामानाचा अंदाज
टॉपिक
Loha Nagarpalika Election Results : “घराणेशाही संपवणार” असा आक्रमक दावा करणाऱ्या भारतीय जनता पक्षाची लोहा नगरपरिषद निवडणुकीत भाजपची घराणेशाही पाहायला मिळाली होती. मात्र, नगरपालिका निवडणुकीत मतदारांनी घराणेशाहीचा धडा शिकवला आहे. भाजपकडून एकाच कुटुंबातील तब्बल सहा जणांना उमेदवारी देण्यात आली होती. त्यामुळे ही निवडणूक केवळ राजकीय नाही तर नैतिकतेचीही कसोटी ठरली होती. मात्र निकालाने भाजपची ही रणनीती पूर्णपणे अपयशी ठरली असून सहाही उमेदवारांना मतदारांनी स्पष्ट नाकारलं आहे.
ADVERTISEMENT
लोहा नगरपरिषद निवडणुकीत आमदार प्रतापराव पाटील चिखलीकर यांच्या नेतृत्वाखाली राष्ट्रवादी काँग्रेसने वर्चस्व प्रस्थापित केले आहे. नगराध्यक्षपदासह तब्बल 17 जागांवर राष्ट्रवादीने विजय मिळवत भाजपचा धुव्वा उडवला. शिवसेना (उद्धव बाळासाहेब ठाकरे) आणि काँग्रेसला प्रत्येकी एकच जागा मिळाली असून भाजपच्या पारड्यात मात्र नामुष्की आली आहे.
या निवडणुकीत भाजपने घराणेशाहीवर मोठा डाव खेळला होता. नगराध्यक्षपदासाठी गजानन सूर्यवंशी यांना उमेदवारी देण्यात आली होती. याच कुटुंबातील इतर सदस्यांनाही विविध प्रभागांतून उमेदवारी देत भाजपने ताकद पणाला लावली. गजानन सूर्यवंशी यांची पत्नी गोदावरी सूर्यवंशी, भाऊ सचिन सूर्यवंशी, भावजय सुप्रिया सूर्यवंशी, मेहुणा युवराज वाघमारे आणि नातेवाईक रीना व्यवहारे अशा सहा उमेदवारांना भाजपच्या तिकिटावर रिंगणात उतरवण्यात आले. मात्र मतदारांनी या ‘एकाच कुटुंबाच्या राजकारणाला’ सपशेल नाकारत सर्वच्या सर्व उमेदवारांचा पराभव केला.
विशेष म्हणजे भाजपने या निवडणुकीसाठी मोठी स्टार प्रचारकांची फौज उतरवली होती. मुख्यमंत्री देवेंद्र फडणवीस, मंत्री पंकजा मुंडे, पालकमंत्री अतुल सावे यांच्या जाहीर सभा झाल्या. तर खासदार अशोक चव्हाण यांनीही कॉर्नर बैठका घेत मतदारांपर्यंत पोहोचण्याचा प्रयत्न केला. मात्र एवढ्या मोठ्या प्रचारयंत्रणेनंतरही भाजपला अपेक्षित यश मिळाले नाही. उलट हा निकाल भाजपसाठी धक्कादायक ठरला असून अशोक चव्हाण यांच्या प्रभावावरही प्रश्नचिन्ह निर्माण झाले आहे.
स्थानिक पातळीवर काम, उमेदवारांची स्वीकारार्हता आणि “घराणेशाहीला विरोध” हा मुद्दा मतदारांनी गंभीरपणे घेतल्याचे या निकालातून स्पष्ट होते. मोठी नावे, जाहीर सभा आणि सत्तेचा प्रभाव असूनही मतदारांनी थेट निर्णय देत भाजपचा डाव उधळून लावला. लोहा नगरपरिषदेचा निकाल हा केवळ एका नगरपरिषदेपुरता मर्यादित न राहता राज्याच्या राजकारणातही महत्त्वाचा संदेश देणारा ठरतो आहे.
इतर महत्त्वाच्या बातम्या
ADVERTISEMENT
