Pune : तरुणीवर हल्ला! दर्शना पवारचा उल्लेख करत राज ठाकरेंनी कुणाला सुनावलं?

27 जून रोजी पुण्यातील मध्यवर्ती भाग असलेल्या सदाशिव पेठेत थरारक घटना घडली. 18 वर्षीय तरुणीवर एका तरुणाने कोयत्याने हल्ला केला. सकाळी साडेसहा वाजताच्या सुमारास हा धक्कादायक प्रकार घडला. यशपाल जवळगे या तरुणाने वार रोखला आणि तरुणी थोडक्यात बचावली. या सगळ्या घटनेनंतर पुण्यातील कायदा व सुव्यवस्था चर्चेत आलीये.

हेही वाचा >> PUNE: ‘तो’ देवदूतच… कोयत्याचा वार झेलला, तरुणीला जीवदान देणारा लेशपाल जवळगे आहे तरी कोण?

या प्रकरणावरून राजकीय वर्तुळात बराच गदारोळ होताना दिसतोय. विरोधक मुख्यमंत्री एकनाथ शिंदे आणि गृहमंत्री देवेंद्र फडणवीस यांना लक्ष्य करत आहेत. दर्शना पवार हत्याकांडानंतर ही घटना घडल्याने सरकार टीकेचे धनी ठरू लागले आहेत.

राज ठाकरे काय म्हणाले?

राज ठाकरे यांनी सोशल मीडियाच्या माध्यमातून या घटनांवर भाष्य केलं आहे. राज ठाकरे म्हणतात, “काल पुण्यात एका तरुणीवर हल्ल्याची दुर्दैवी घटना घडली. भररस्त्यात बाकीचे लोकं बघत असताना लेशपाल जवळगे नावाचा तरुण तिथे होता म्हणून ती तरुणी बचावली. लेशपालने जे धाडस दाखवलं त्याबद्दल त्याचं मनापासून कौतुक, पण आसपास इतकी लोकं बघ्याच्या भूमिकेत का गेली किंवा जातात ह्याचं आश्चर्य वाटतं. अर्थात पुढे कशाला चौकशीचा ससेमिरा असा विचार लोकांच्या मनात येत असेलही कदाचित पण ह्यासाठी पोलिसांनी लोकांना आश्वस्त करायला हवं.”