Air India Plane Crash: रोशनी सोनघरेची इंस्टाग्रामवरची शेवटची पोस्ट अन्...

कोण होती रोशनी सोनघरे?

रोशनी सोनघरे ही 27 वर्षीय तरुणी ही डोंबिवली येथील रहिवासी होती. ती डोंबिवली पूर्वेकडील राजाजी पथ परिसरातील नव उमिया कृपा सोसायटीमध्ये आपल्या आई-वडील (राजेंद्र आणि राजश्री सोनघरे) आणि भाऊ विघ्नेश यांच्यासोबत राहत होती. रोशनीला लहानपणापासूनच हवाई सुंदरी (फ्लाइट अटेंडंट) बनण्याचे स्वप्न होतं. या स्वप्नाला सत्यात उतरवण्यासाठी तिने प्रचंड मेहनत आणि जिद्द दाखवली. गेल्या दोन वर्षांपासून ती एअर इंडियामध्ये फ्लाइट क्रू मेंबर म्हणून कार्यरत होती.

रोशनी केवळ एक यशस्वी फ्लाइट अटेंडंटच नव्हती, तर ती एक लोकप्रिय ट्रॅव्हल इन्फ्लुएन्सर देखील होती. तिच्या इंस्टाग्राम खात्यावर 56,000 हून अधिक फॉलोअर्स होते. तिने आपल्या प्रवासातील अनुभव, अनोखी शैली आणि सकारात्मक ऊर्जेने अनेकांची मने जिंकली होती. तिच्या ट्रॅव्हल व्लॉग्सना प्रेक्षकांचा प्रचंड प्रतिसाद मिळायचा.

रोशनीने इंस्टाग्रामवर शेवटचे कोणते फोटो केले होते शेअर?

रोशनीने एक आठवड्यापूर्वीच इंस्टाग्रामवर तिचे काही फोटो शेअर केले होते. अत्यटंत ग्लॅमरस आणि स्टायलिश असलेल्या रोशीने हिरव्या रंगाचा क्रॉप टॉप आणि जीन्स परिधान केलेली. एका मॉलमधील गेम झोनमध्ये असताना तिने हे फोटो शेअर केले होते. ज्याला तिने “tere jaise छत्तीस or mere jaisa milta nhi” असं कॅपशनही दिलेले. 

तिचे हेच फोटो आणि हीच पोस्ट आता शेवटची ठरली आहे.कारण या पोस्टनंतर रोशनी ही अहमदाबाद-लंडन फ्लाइटमध्ये क्रू मेंबर म्हणून गेली होती. पण काल (12 जून) झालेल्या भीषण अपघातात तिचा दुर्दैवी मृत्यू झाला

अपघाताची घटना

12 जून 2025 रोजी दुपारी 1:39 वाजता एअर इंडियाचे बोईंग 787 ड्रीमलाइनर विमान अहमदाबादहून लंडनच्या गॅटविक विमानतळाकडे निघाले होते. विमानात 230 प्रवासी आणि 12 क्रू मेंबर्स होते. उड्डाणानंतर अवघ्या 10-15 मिनिटांतच विमान मेघानीनगर परिसरातील बी.जे. मेडिकल कॉलेजच्या वसतिगृहाच्या इमारतीवर कोसळले. या अपघातामुळे विमानाचा बहुतांश भाग जळून खाक झाला, तसेच इमारतीचेही मोठे नुकसान झाले.

या अपघाताचे कारण अद्याप पूर्णपणे स्पष्ट झालेले नाही, परंतु प्राथमिक माहितीनुसार, विमानाच्या इंजिनात बिघाड किंवा पक्ष्यांशी धडक (बर्ड स्ट्राइक) यामुळे हा अपघात घडला असावा, अशी शक्यता व्यक्त केली जात आहे. विमानात 1.25 लाख लिटर इंधन होते, ज्यामुळे अपघातानंतर प्रचंड आग लागली आणि बचावकार्याला अडथळे निर्माण झाले.

रोशनीचा मृत्यू आणि कुटुंबावर दुखाचा डोंगर

या भीषण अपघातात रोशनी सोनघरेसह विमानातील 12 क्रू मेंबर्स आणि 230 प्रवाशांचा मृत्यू झाला. रोशनीच्या मृत्यूने त्यांच्या कुटुंबावर आणि डोंबिवलीत शोककळा पसरली आहे. रोशनीच्या निधनाचं वृत्त समजताच तिच्या वडिलांनी आणि भावाने अहमदाबादला धाव घेतली.

रोशनीच्या मृत्यूनंतर तिच्या इंस्टाग्राम खात्यावर शेकडो चाहत्यांनी शोकसंदेश लिहिले. तिच्या शेवटच्या पोस्टवर अनेकांनी तिच्या सकारात्मक व्यक्तिमत्त्वाची आणि प्रेरणादायी प्रवासाची प्रशंसा केली.

प्रशासन आणि समाजाची प्रतिक्रिया

या दुर्घटनेनंतर गुजरात सरकारने तातडीने बचावकार्य सुरू केले. जखमींना तात्काळ रुग्णालयात दाखल करण्यात आले, तर मृतदेह ओळखण्यासाठी डीएनए चाचण्यांचे काम सुरू आहे. एअर इंडियाने प्रवाशांच्या नातेवाईकांसाठी हेल्पलाइन क्रमांक (18005691444 आणि +919974111327) जारी केले आहेत. टाटा समूहाने प्रत्येक मृताच्या कुटुंबाला 1 कोटी रुपये आणि जखमींच्या उपचाराचा खर्च उचलण्याची घोषणा केली आहे.

पंतप्रधान नरेंद्र मोदी, केंद्रीय गृहमंत्री अमित शाह आणि नागरी विमान वाहतूक मंत्री राम मोहन नायडू यांनी घटनास्थळाला भेट देऊन परिस्थितीचा आढावा घेतला. बॉलिवूडमधील अक्षय कुमार, सोनू सूद, दिशा पटानी आणि जान्हवी कपूर यांसारख्या कलाकारांनी या दुर्घटनेवर शोक व्यक्त केला.