टीव्हीवर कुस्ती बघताना मी थोडा अस्वस्थ होतो, कारण... -शरद पवार

Sharad Pawar On Maharashtra Kesari 2023 : महाराष्ट्र केसरी विजेता शिवराज राक्षेंचं शरद पवारांनी केलं कौतुक
Sharad pawar praises maharashtra kesari winner shivraj rakshe
Sharad pawar praises maharashtra kesari winner shivraj rakshe

पुण्यात पार पडलेल्या महाराष्ट्र केसरी स्पर्धेत मूळचा पुण्यातील आणि नांदेडचं प्रतिनिधित्व करणाऱ्या मल्ल शिवराज राक्षेंनं मानाची गदा पटकावली. शिवराज राक्षेने आज शरद पवार यांची पुण्यातल्या निवासस्थानी भेट घेतली. त्यानंतर शरद पवारांनी राक्षेंचं कौतुक करताना कालच्या सामन्याबद्दलचा अनुभवही सांगितला.

महाराष्ट्र केसरी पटकावणाऱ्या शिवराज राक्षे याने शरद पवारांची भेट घेतली. त्यानंतर पवारांनी माध्यमांशी संवाद साधला. यावेळी पवार म्हणाले, "शिवराज राक्षेंने नांदेडचं प्रतिनिधीत्व केलं असलं, तर पुणे जिल्ह्यातील राजगुरू नगरमध्ये त्याचं आयुष्य गेलंय. कुस्तीबद्दल आकर्षण होतं. त्याच्यासमोर उद्दिष्ट होतं. त्याने महाराष्ट्र केसरी मिळवून पूर्ण केलं. त्याला आधीच मिळालं असतं, पण त्याला शारीरिक इजा झाली होती. वर्षभर उपचार घ्यावी लागली. ते उपचार महागडे होते."

पवार पुढे बोलताना म्हणाले, "अनेक खेळांच्या संघटनेच्या बाबतीत माझा पाठिंबा असतो. मदत असते. मग क्रिकेटचं नेतृत्वही मी केलं. त्या त्या क्षेत्रात मी जे करता येईल, ते करण्याची काळजी आम्ही घेतली. भारतीय खेळांची किंमत राखली पाहिजे. त्यामुळे मी या खेळांना मी सहकार्य केलं. मी दोन्ही संघटनेचा देश आणि आशियाई अध्यक्ष होतो. मी ती जबाबदारी घेतली होती."

ग्रामीण भागातून येणाऱ्या मुलांना मदतीची भूमिका -शरद पवार

"काहीही संकट आलं, तरी पाठिशी उभं राहायचं ही माझी भूमिका राहिली आहे. या सगळ्यांची पार्श्वभूमी ग्रामीण भागातील आहेत. ते श्रीमंत घरातील नाहीत. त्यामुळे घर सोडून राहणं खर्चिक असतं. त्या मुलांना मदत करणं आणि उत्तम प्रकारे प्रशिक्षण देणं महत्त्वाचं आहे. ती जबाबदारी काका पवार आणि त्यांच्या सहकार्यांनी उचलली. ही एक मालिका तयार झाली. अभिजित कटके, हर्षवर्धन, उत्कर्ष, राहुल आवारे या सगळ्या मुलांना जी मदत करता येईल, ती आम्ही सतत घेतली", असं पवार यावेळी म्हणाले.

कुस्ती पाहताना अस्वस्थ झालो होतो -शरद पवार

कालच्या सामन्याबद्दल बोलताना पवार म्हणाले, "आज पहिला प्रसंग आहे, जे आम्ही जाहीरपणे सांगतो आहोत. या लोकांची रक्कम 76 लाख होती. त्याला लोकांना प्रोत्साहन करण्यासाठी होती. ही गोष्ट मी आणि आमच्या भावकीला माहिती होती. आज पहिल्यांदा. मी कालची कुस्ती टीव्हीवर बघत होतो. आणि मी थोडा अस्वस्थ होतो. कारण दोन्ही पैलवान एका तालमीत वाढलेले. शिवराजने कर्तृत्व दाखवलं आणि त्याच्या मेहनतीचं चीज झालं."

शरद पवारांनी शिवराज राक्षेला सांगितलं कुस्तीगिरांचं स्वप्न

"मला शिवराज इतकंच सांगायचं की, महाराष्ट्र केसरी हा पहिला टप्पा आहे. यानंतर राष्ट्रीय स्पर्धा. आशियाई आणि फार वर्षांपासून एक स्वप्न या देशातील कुस्तीगीरांचं आहे. ऑलिम्पिकमध्ये जायचं. आजचा दिवस हा खाशाबा जाधवांचा आठवण करण्याचा दिवस आहे. खाशबा जाधवांनी ऑलिम्पिकमध्ये पदार्पण केलं. त्यानंतर इतक्या वर्षाच्या काळात आपण काही करू शकलो नाही, याची अस्वस्था या क्षेत्रातील आम्हा सगळ्यांना आहे", असं पवार म्हणाले.

पुढे बोलताना शरद पवार म्हणाले, "मला इतकंच वाटतं की शिवराजने ही जी अस्वस्थता आहे, ती दूर करावी. त्यासाठी जी काही साथ लागेल. ती आमच्या सगळ्यांची साथ त्याच्या पाठिशी असेल. आज त्याने जे कतृर्त्व दाखवलं, त्याबद्दल आपल्या सगळ्यांच्यावतीने मी त्यांचं अभिनंदन करतो आणि शुभेच्छा देतो."

Related Stories

No stories found.
logo
Mumbai Tak
www.mumbaitak.in