थंडीने कुडकुडू लागले म्हणून रुममध्ये शेगडीत शेकोटी पेटवली, पण झोपेत श्वास घेता आला नाही, 3 मित्रांचा गुदमरुन मृत्यू
Belagavi News : थंडीने कुडकुडू लागले म्हणून रुममध्ये शेगडीत शेकोटी पेटवली, पण झोपेत श्वास घेता आला नाही, 3 मित्रांचा गुदमरुन मृत्यू
ADVERTISEMENT

बातम्या हायलाइट
थंडीने कुडकुडू लागले म्हणून रुममध्ये शेगडीत शेकोटी पेटवली
पण झोपेत श्वास घेता आला नाही, 3 मित्रांचा गुदमरुन मृत्यू
Belagavi News : बेळगाव शहरातील अमननगर भागात घडलेल्या एका हृदयद्रावक घटनेने परिसरात शोककळा पसरली आहे. थंडीपासून बचाव करण्यासाठी खोलीत कोळशाची शेगडी पेटवून झोपलेल्या चार मित्रांपैकी तिघांचा दुर्दैवी मृत्यू झाला असून, एक तरुण गंभीर अवस्थेत उपचार घेत आहे. मंगळवारी सकाळी ही घटना उघडकीस आली. मृतांमध्ये रिहान मते (22), सरफराज हरपणहळ्ळी (22) आणि मोईन नलबंध (23) या तिघांचा समावेश असून शहानवाज (19) हा तरुण गंभीर अवस्थेत जिल्हा रुग्णालयात दाखल आहे.
अमननगर परिसरात भाड्याच्या खोलीत राहणारे हे चारही तरुण सोमवारच्या रात्री थंडीचा कडाका वाढल्याने विशेष काळजी घेत झोपण्याच्या तयारीत होते. गारवा टाळण्यासाठी त्यांनी कोळशाची शेगडी पेटवली आणि झोपेत थंडी लागू नये म्हणून खोलीचे सर्व दरवाजे व खिडक्या घट्ट बंद केल्या. मात्र हाच निर्णय त्यांच्या जीवावर बेतला.
कोळसा जळताना निर्माण होणारा कार्बन मोनोऑक्साइड हा अत्यंत विषारी वायू खोलीत भरत गेला. दरवाजे-खिडक्यांची हवा खेळती नसल्याने हा वायू बाहेर निघू शकला नाही. झोपेत असलेल्या तरुणांना परिस्थितीची जाणीवही झाली नाही. काही वेळातच खोलीतील ऑक्सिजनची पातळी घटली आणि श्वसनास त्रास होऊ लागला. परिणामी तिघांचा जागच्या जागी मृत्यू झाला. शहानवाजला मात्र काहीसा श्वास मिळाल्याने तो गंभीर अवस्थेत सापडला आणि तातडीने रुग्णालयात हलवण्यात आला.
मंगळवारी सकाळी दरवाजा उघडत नसल्याने शेजाऱ्यांना संशय आला. त्यांनी आत डोकावून पाहिले असता तरुण बेशुद्ध अवस्थेत पडलेले दिसले. तत्काळ पोलिसांना कळवण्यात आले. पोलीस आणि स्थानिक नागरिकांच्या मदतीने चारही तरुणांना बाहेर काढून रुग्णालयात हलवण्यात आले, मात्र तिघांना डॉक्टरांनी मृत घोषित केले. या घटनेमुळे परिसरात मोठी खळबळ माजली आहे. तरुणांचे नातेवाईक आणि मित्र घटनास्थळी धावून आले असून वातावरणात शोककळा पसरली आहे. हिवाळ्यात शेगडी किंवा कोळसा यांचा वापर करताना पुरेशी हवा खेळती ठेवण्याचे आवाहन प्रशासनाने केले आहे.
अमननगरमधील हा प्रकार पुन्हा एकदा सावधगिरीचे महत्त्व अधोरेखित करतो. थंडीपासून बचाव करण्यासाठी घेतलेली उपाययोजना किती धोकादायक ठरू शकते, याची जाणीव स्थानिकांमध्ये व्यक्त होत आहे.
इतर महत्त्वाच्या बातम्या
भाजपचीही घराणेशाही जोमात, एकाच कुटुंबातील सहा जणांना दिली उमेदवारी, कोणत्या जिल्ह्यात लढणार निवडणूक?
