Maharashtra lok Sabha : भाजपने राज ठाकरेंना का सोबत घेतले? मोदींनीच दिले उत्तर

पंतप्रधान नरेंद्र मोदी यांची 'लोकमत'ला मुलाखत दिली. लोकांच्या मनात प्रश्न आहे की, भाजपला विजयाची खात्री एवढी खात्री होती, तरी त्यांनी राज ठाकरेंना सोबत का घेतले? असा प्रश्न मोदींना विचारण्यात आला. 

राज ठाकरेंना भाजपने का घेतले सोबत?

या प्रश्नाला उत्तर देताना मोदी म्हणाले की, "मी आधीच सांगितल्याप्रमाणे देशाला जो सर्वोच्च प्राधान्य देतो, त्याचे आम्ही नेहमीच स्वागत करतो. गेल्या १० वर्षांपासून आम्ही स्वबळावर बहुमतात आहोत. मात्र, तरीही आम्ही कायमच नव्या मित्रांचे स्वागत केले आहे."

हेही वाचा >> मोदींचं 'ते' विधान ठाकरेंच्या जिव्हारी! म्हणाले, "माफ करणार नाही"

"आपल्या लोकशाहीसाठी हे चांगले आहे. अधिकाधिक राजकीय पक्षांनी एकत्र येऊन लोकांच्या कल्याणासाठी काम करणे केव्हाही चांगलेच असते. राज ठाकरे आमच्यासाठी नवीन नाहीत. त्यांनी यापूर्वीही आम्हाला पाठिंबा दिला आहे", असे मोदी म्हणाले. 

'त्या' सगळ्यांचं आम्ही स्वागत करू -नरेंद्र मोदी

या प्रश्नाला उत्तर देताना मोदी पुढे म्हणाले, "आम्ही देशासाठी चांगले काम केले आहे, यावर त्यांचा विश्वास आहे. आमच्या विचारांना तसेच आमच्या द्रष्टेपणाला ते पाठिंबा देतात. महाराष्ट्राच्या विकासातही ते हातभार लावू शकतील, असे आम्हाला वाटते."

हेही वाचा >>  बारामतीतील मतदानानंतर शरद पवारांबद्दल अजित पवारांची भाषा का बदलली?

"हे एकत्र येणे केवळ सत्तेसाठी किंवा राजकीय गणितांसाठी आहे, असे नाही. लोकसेवेसाठी एकत्र येणे, हा त्यामागचा उद्देश आहे. वस्तुतः देशहितासाठी जो कुणी आमच्याकडे येईल, त्या प्रत्येकाचे आम्ही सहर्ष स्वागत करू", अशी भूमिका मोदींनी राज ठाकरेंना भाजपसोबत घेण्याबद्दल मांडली.