कोरोनाग्रस्त रुग्णाच्या मृत्यूनंतरही तीन दिवस उपचार, नांदेडमधील रुग्णालयात धक्कादायक प्रकार

नांदेडमधील हिंगोली गेट परिसरात असलेल्या गोदावरी हॉस्पिटलमध्ये हा धक्कादायक प्रकार घडला आहे. पेशाने शिक्षक असलेल्या अंकलेश पवार यांचा कोरोनामुळे उपचार घेत असताना मृत्यू झाला. परंतू हॉस्पिटल प्रशासनाने पुढचे तीन दिवस त्यांच्यावर उपचार असल्याचं दाखवत त्यांच्या पत्नीकडून १ लाख ४० हजार रुपये उकळले. हॉस्पिटल प्रशासनाला याबद्दल जाब विचारला असता सुरुवातीला त्यांनी उडवाउडवीची उत्तरं दिली. परंतू अखेरीस न्यायालयात धाव घेतल्यानंतर गोदावरी हॉस्पिटलविरोधात गुन्हा दाखल करण्यात आला आहे.

नेमका काय घडला प्रकार?

अंकलेश पवार यांना कोरोनाची लागण झाल्यानंतर १६ एप्रिलला उपचारासाठी गोदावरी हॉस्पिटलमध्ये दाखल करण्यात आलं. यावेळी पवार यांच्या पत्नीने हॉस्पिटलमध्ये ५० हजार रुपये फी जमा केली. यानंतर २० एप्रिलला अंकलेश पवार यांची तब्येत खराब झाल्यामुळे त्यांना ICU मध्ये दाखल करण्यात आलं. २१ एप्रिलला हॉस्पिटल प्रशासनाने अंकलेश यांच्या पत्नीकडे पुन्हा एकदा फी म्हणून पैशांची मागणी केली.

यावेळी अंकलेश यांच्या पत्नी शुभांगी पवार यांनी हॉस्पिटल प्रशासनाला २ दिवसांचा वेळ मागितला. २४ एप्रिलला सकाळी ११ वाजता शुभांगी पवार यांनी ५० हजार रुपये ऑनलाईन तर ४० हजार रुपये रोख अशी रक्कम हॉस्पिटलच्या खात्यात जमा केली. हे पैसे मिळाल्यानंतर हॉस्पिटल प्रशासनाने दुपारी १२ वाजल्याच्या दरम्यान अंकलेश पवार यांचं निधन झाल्याचं त्यांच्या परिवाराला कळवलं.

नागपूर : कोरोनामुळे मृत्यू झालेल्या रुग्णांचे दागिने, मोबाईल चोरणारे दोन आरोपी अटकेत

अशी उघड झाली हॉस्पिटलची लबाडी –

पतीच्या मृत्यूनंतर शोकाकूल वातावरणात पवार यांच्या पत्नीला सुरुवातीला पैशांबद्दल फारसं कळलं नाही. परंतू २५ एप्रिलला ज्यावेळी हॉस्पिटल प्रशासनाने अंकलेश यांचं मृत्यू प्रमाणपत्र जारी केलं, त्यात त्यांच्या मृत्यूची तारीख ही २१ एप्रिल अशी लिहली होती. याचाच अर्थ रुग्णावर उपचार करण्याच्या बहाण्याने हॉस्पिटने पवार यांच्या पत्नीकडून पैसे उकळले.

याबद्दल जाब विचारला असता सुरुवातीला हॉस्पिटल प्रशासनाने उडवाउडवीची उत्तर दिली. अखेरीस पवार यांनी नांदेड न्यायालयात धाव घेतली. यावेळी सुनावणीदरम्यान न्यायालयाने शिवाजीनगर पोलीस ठाण्याला हॉस्पिटलचे डॉक्टर आणि कर्मचाऱ्यांविरोधात ४२० कलमाअंतर्गत गुन्हा दाखल करण्याचे आदेश दिले. यानुसार नांदेड येथील शिवाजीनगर पोलिसांनी हॉस्पिटलविरोधात गुन्हा दाखल केला असून पुढील तपास सुरु आहे.