नागालँडमधील यशानंतर आठवलेंचा भाजपला पाठिंबा जाहीर; नड्डांकडे मोठी मागणी

मुंबई : गुरुवारी जाहीर झालेल्या ईशान्येकडील तीन राज्यांच्या विधानसभा निवडणूक निकालात नागालँडमध्ये केंद्रीय मंत्री रामदास आठवले (Ramdas Aathwale) यांच्या रिपब्लिकन पार्टी ऑफ इंडिया पक्षाने झेंडा फडकवला आहे. इतिहासात पहिल्यांदाच आठवले यांच्या पक्षाने महाराष्ट्राबाहेर काही जागा जिंकल्या आहेत. नागालँडमधील (Nagaland Assembly Election result 2023) दोन जागांवर रिपब्लिकन पार्टी ऑफ इंडियाचे (Republican Party of India) दोन आमदार निवडून आले आहेत. (Ramdas Athawale’s Republican Party of India has won two seats in Nagaland.)

नागालॅंडमध्ये RPI (A) च्या तिकिटावर Y. लिमा ओनेन चँग (Y. Lima Onen Chang) यांनी नागालँडमधील नोक्सेन (Noksen) जागेवरुन विजय मिळविला आहे. तर इम्तिचोबा (Imtichoba) यांनी तुएनसांग सदर-II (Tuensang Sadar-II seat) ही जागा जिंकली आहे. रिपब्लिकन पक्षाचे विनोद निकाळजे यांच्याकडे पक्षाच्या ईशान्येकडील कामकाज सांभाळण्याची जबाबदारी देण्यात आली होती. दरम्यान, या निकालानंतर आता आठवले यांनी भाजपला पाठिंबा जाहीर केला असून एका मंत्रिपदाचीही मागणी केली आहे.

केन्द्रीय मंत्री रामदास अठावले का कहना है कि नागालैंड चुनाव में RPI(A) ने 2 सीटों पर जीत दर्ज की है जिसके चलते RPI(A) को एक मंत्री पद मिलना चाहिए, इसके लिए वह एनडीए से बात करेंगे और जेपी नड्डा के साथ मुलाकात करेंगे।#ReporterDiary #Nagaland #NagalandElections (@mustafashk) pic.twitter.com/R93jL8Jz3c

— AajTak (@aajtak) March 3, 2023

‘आज तक’शी बोलताना आठवले म्हणाले, नागालँडमध्ये आमची भाजपसोबत युती नव्हती. आम्ही आमच्या बळावर ही निवडणूक लढवली होती. यात आम्ही ८ जागांवर निवडणूक लढवली होती. त्यातील आम्हाला ५ तरी जागा निवडून येतील हा विश्वास होता. पण तिथल्या मतदारांनी आम्हाला २ जागा दिल्या. आता आम्ही तिथं एनडीएचं समर्थन करु आणि सत्तेत सहभागी होऊ. याशिवाय मी आता जे. पी. नड्डांनाही भेटणार असून रिपब्लिक पक्षाचे आमदार त्यांच्यासोबत असल्याचं सांगणार आहे. तसंच तिथं आम्हाला एक मंत्रीपद मिळावं अशी मागणी करणार असल्याचही आठवले यांनी बोलताना सांगितलं.

नागालँडमध्ये राष्ट्रवादीचाही झेंडा :

नागालँड विधानसभा निवडणुकीत महाराष्ट्रातील प्रमुख पक्ष असलेल्या राष्ट्रवादीलाही मोठं यश मिळालं आहे. नागालॅंड (Nagaland) विधानसभेत राष्ट्रवादीला (NCP) ७ जागांवर विजय मिळाला आहे. तर ५ जागांवर दुसऱ्या क्रमाकांची मतं मिळाली आहेत. त्याचवेळी शरद पवार (Sharad Pawar) यांचा सहकारी पक्ष असलेल्या काँग्रेसला (Congress) मात्र भोपळाही फोडता आलेला नाही.