एकनाथ शिंदेंची बंडखोरी ते भाजपची एन्ट्री! आठ दिवसात काय काय घडलं?

२० जूनला विधान परिषदेची निवडणूक झाली. त्यात भाजपचे पाचही आमदार निवडून आले आणि त्यानंतर देवेंद्र फडणवीस यांनी सत्ताधारी पक्षात नाराज असलेल्या आमदारांनी आम्हाला मतदान केलं असं सांगितलं. २० जूनच्या रात्रीच राजकीय भूकंप होणार आहे याची कल्पना तेव्हा कुणालाच नव्हती. २१ जूनला तो झाला आणि असा झाला की त्याचे पडसाद अजूनही उमटत आहेत.

२१ जूनला काय समोर आलं?

शिवसेनेतले क्रमांक दोनचे नेते आणि नगरविकास मंत्री एकनाथ शिंदे नॉट रिचेबल असल्याची बातमी समोर आली एवढंच नाही तर त्यांच्यासोबत काही आमदारही नॉट रिचेबल आहेत असं कळलं. सुरूवातीला दहा आमदार, मग पंधरा आमदार मग २० करत ही संख्या वाढत गेली.हे सगळे जण सुरतमध्ये आहेत ही माहिती समोर आली. महाराष्ट्राच्या राजकारणातील भूकंपाचं केंद्र सुरतमध्ये असल्याची माहिती समोर आली.