Inside Story: शरद पवारांना दाखवला कात्रजचा घाट, अजितदादांनी 30 जूनलाच कसा साधला डाव?

अजित पवार यांनी 2 जुलैला उपमुख्यमंत्री पदाची शपथ घेतली. पण हे सारं काही एका दिवसात घडून आलं नाही. तर गेले अनेक दिवस व्यवस्थिती रणनिती आखण्यात आली होती. ज्याची खरी अंमलबजावणी ही 30 जूनलाच करण्यात आली होती. सर्वात आधी 30 जून रोजी अजित पवारांनी आपल्या विरोधी पक्षनेते पदाचा राजीनामा दिला. तर दुसरीकडे आपल्या आमदारांची आणि पदाधिकाऱ्यांची अतिशय गुप्तपणे बैठक घेतली. या बैठकीत अजित पवारांची राष्ट्रीय अध्यक्ष म्हणून नेमणूक केली. तसंच विधीमंडळ नेता म्हणूनही निवड करण्यात आली. याशिवाय याच दिवशी निवडणूक आयोगाकडे पक्षावर दावा करणारा अर्जही त्यांनी त्याच दिवशी पाठवला होता. पण या सगळ्याबाबत त्यांनी कोणालाही कुणकुण लागू दिली नव्हती.

आता या सगळ्याबाबत विशेषत: 30 जूनच्या बैठकीबाबत आणि त्यानंतर काय-काय करण्यात आलं याविषयी अजित पवार गटाचे नेते प्रफुल पटेल यांनी अगदी सविस्तरपणे माहिती दिली आहे.

पाहा प्रफुल पटेल 30 जूनच्या बैठकीबाबत काय-काय म्हणाले:

‘आमच्याबाबत संभ्रम आणि काही चुकीची माहिती पसरविण्यात येत आहे. परिस्थिती काय आहे हे आम्ही सांगण्यासाठी आपल्या समोर आलो आहोत.’