शेतकऱ्यांच्या मागण्या मान्य न झाल्यास रेल्वे रोखणार, बच्चू कडूंचा नागपूरमधील आंदोलनातून निर्वाणीचा इशाारा

Bachchu Kadu Farmer Protest, Nagpur : प्रहार संघटनेचे नेते बच्चू कडू यांनी नागपूरमध्ये शेतकऱ्यांच्या न्याय्य मागण्यांसाठी चक्काजाम आंदोलन सुरु केलंय. शेतकरी कर्जमाफी, शेतमालाला हमीभाव, दुधाला योग्य दर आणि कांद्याला स्थिर बाजारभाव या प्रमुख मागण्यांसाठी बुधवारी सकाळपासून प्रहार संघटनेने जबलपूर-हैदराबाद महामार्ग रोखलाय. शेतकऱ्यांना दिलासा न मिळाल्यास रेल्वे रोखण्याचा थेट इशारा देत बच्चू कडू यांनी सरकारला अल्टिमेटम दिलं आहे. आंदोलन सुरु असताना प्रहारचे कार्यकर्ते रस्त्यावर झोपलेले पाहायला मिळाले आहेत, त्यांनी सरकारविरोधात जोरदार घोषणाबाजी देखील केली आहे. आंदोलनकर्त्यांनी नागपूर-वर्धा आणि जबलपूर-हैदराबाद महामार्गांसह चार प्रमुख मार्ग बंद केले आहेत. परिणामी वाहतूक पूर्णपणे ठप्प झाली असून, गेल्या 15 तासांहून अधिक काळ शेकडो वाहने महामार्गावर अडकून पडली आहेत.