Maharashtra Lok Sabha : अजित पवारांना धक्के, फडणवीसांनी विधानसभेसाठी टाकला डाव?

लोकसभेला ४८ जागांचं वाटप करतानाच महायुती आणि महाविकास आघाडीतील नेत्यांच्या नाकीनऊ आले. विधानसभेला तर २८८ जागांचा विषय असणार आहे. त्यामुळे हे किती मोठी डोकेदुखी असणार आहे, याची कल्पना यायला लागली आहे. लोकसभेच्या प्रचारसभांमध्येच याची प्रचिती यायला लागली आहे. काही प्रमुख पक्षांनी आपले उमेदवारच जाहीर करायला सुरुवात केलीये. त्यामुळे आतापासूनच काही विधानसभा मतदारसंघात महायुतीमध्ये संघर्ष सुरु होणार, अशी शक्यता दिसत आहे.

हेही वाचा >> "आमची चूक झाली", उद्धव ठाकरेंबद्दल बोलताना फडणवीसांचं मोठं विधान 

महाविकास आघाडी आणि महायुतीमध्ये अनेक ठिकाणी धूसफूस असल्याचं चित्र अजूनही दिसून येतंय. बड्या नेत्यांकडून जरी एकीनं काम करण्याची भाषा माध्यमांसमोर वापरली जात असली, तरी स्थानिक लेव्हलला बऱ्याच ठिकाणी संघर्ष सुरु असल्याचं दिसून आलंय. 

आता लोकसभेचा हा गोंधळ सुरु असतानाच विधानसभा मतदारसंघातही संघर्षाची चिन्हं दिसायला लागली आहेत. दोन जागांवर ठिणगी देखील पडलीय असं आपण म्हणू शकतो. 

दोन मतदारसंघात संघर्ष

पहिला मतदारसंघ आहे इंदापूर. इंदापूर मतदार संघात आता हर्षवर्धन पाटील आणि दत्ता भरणे या दोघांमधला संघर्ष नवा नाही. लोकसभेसाठी हर्षवर्धन पाटलांनी वरिष्ठांचे आदेश मानत सुनेत्रा पवारांसाठी काम करण्याचे आदेश कार्यकर्त्यांना दिले. अर्थात त्यांनी किती काम केलंय हे येत्या ४ जूनलाच कळणार आहे. 

लोकसभेला अजितदादांना मदत करण्याआधी हर्षवर्धन पाटील आणि त्यांच्या कुटुंबानं बऱ्याच गोष्टी क्लिअर केल्यात. पाटलांच्य कन्या अंकिता पाटील यांनी जो आम्हाला विधानसभेत मदत करेल त्यालाच आम्ही लोकसभेत मदत करु असा इशारा दिला होता.

हेही वाचा >> दोन्ही राष्ट्रवादी भविष्यात एकत्र येणार? अजित पवारांचे सूचक विधान

2024 ला इंदापूर विधानसभा हर्षवर्धन पाटीलच लढणार असल्याचे त्यांचे पूत्र राजवर्धन यांनी आधीच सांगून टाकलंय. ‘आम्ही आधी महाआघाडीत होतो. आता महायुतीत आहोत. ह्यांनी मागील तीनही वेळेस शब्द देऊन फिरविलेला आहे. आमची फसवणूक केलेली आहे. आमच्या पाटीत खंजीर खुपसला आहे. या वेळेस जे कोणी उमेदवार असतील आमचं जे कोणी विधानसभेत काम करेल त्यांचे आम्ही लोकसभेत काम करू’,  असं अंकिता पाटील या म्हणालेल्या. 

दत्ता भरणेंचं काय होणार?

अजित पवार गटाचे दत्तात्रय भरणे इंदापूरचे सध्याचे आमदार आहेत. नव्या नेतृत्वाला लगेच उत्तर देण्याचे काही कारण नाही असं सांगून अजित पवार यांनी त्यावेळी वेळ मारुन नेली होती. लोकसभेसाठी जरी अजित पवार आणि हर्षवर्धन पाटलांमध्ये पॅचअप झालंय.

यामध्ये सर्वात महत्त्वाचा रोल होता देवेंद्र फडणवीसांचा. फडणवीसांनी स्वत: इंदापुरात येऊन हर्षवर्धन पाटलांच्या कार्यकर्त्यांची समजून घातली होती आणि शब्दही दिला होता. त्यानंतर अजित पवारांसाठी पाटलांनी मेळावा घेतला. या मेळाव्यातही हर्षवर्धन पाटलांच्या कार्यकर्त्यांनी जाहीर नाराजी बोलून दाखवलेली.

हेही वाचा >> भाजपने राज ठाकरेंना का सोबत घेतले? मोदींनीच दिले उत्तर

मात्र, शेवटी पाटलांनी फडणवीसांमुळं दादांशी पॅचअप केलं आणि सुनेत्रा पवारांसाठी ताकद लावली. आता हर्षवर्धन पाटील विधानसभेसाठी इच्छुक आहेत. त्यामुळं पाटलांनी केलेल्या मदतीमुळं अजित पवारांनी ढिल दिलीच तर दत्ता भरणेंचं अवघड होणार असल्याचं बोललं जातंय.   

आष्टी विधानसभा... सुरेश धसांना उमेदवारी जाहीर

आता दुसरा मतदारसंघ आहे बीडमधला आष्टी. त्याचं झालं असं की, नगरला सुजय विखेंसाठी सभा झाली. या सभेला फडणवीस आले होते. निलेश लंकेंच्या विरोधात जामखेडमध्ये ही सभा झाली. या सभेला राम शिंदे, सुरेश धस आवर्जून उपस्थित होते.

यावेळी फडणवीसांनी  विखेंचे कौतुक करीत त्यांच्यासाठी मते तर मागितली, पण येणाऱ्या विधानसभा निवडणुकीसाठी आपल्या दोन लाडक्या शिलेदारांचेही प्रमोशन सुद्धा केलं. 

‘तुम्ही मला आमदार-खासदार द्या, मी तुमची सगळी स्वप्न पूर्ण करतो’, असे म्हणत फडणवीस यांनी कर्जत-जामखेडमधून आमदार प्रा. राम शिंदे, तर शेजारच्या आष्टीमधून आमदार सुरेश धस यांची विधानसभेसाठी उमेदवारी घोषित केली.

विशेष म्हणजे आष्टीमध्ये अजित पवार यांच्या नेतृत्वाखालील राष्ट्रवादी काँग्रेसचे बाळासाहेब आजबे आमदार आहेत. तरीदेखील फडणवीस यांनी आष्टीमधून आगामी विधानसभेसाठी धस यांचे नाव घोषित केले. फडणवीस यांच्या घोषणेने महायुतीत मिठाचा खडा पडल्याची चर्चा आष्टी मतदारसंघात सुरू झाली आहे.
 
लोकसभेच्या निवडणुका अजून सुरु आहेत, लोकसभेला अन्याय झालेल्यांचीच यादी महायुती आणि महाविकास आघाडीमध्ये मोठी आहे. विधानसभेला अजून किमान पाच महिने बाकी आहेत, अशात युतीतील विधानसभेच्या जागांवरुन धुसफूस समोर येऊ लागली आहे. त्यामुळं हा तर ट्रेलर आहे पिक्चर तो अभी बाकी है, असंच राजकीय विश्लेषक तरी सध्या सांगत आहेत.