पाणी, वैद्यकीय तपासणी अन् उपचार बंद

जात प्रमाणपत्राच्या पडताळणीबाबत बोलताना जरांगे यांनी प्रशासकीय कारभारावर कडाडून टीका केली. हैदराबाद गॅजेटनुसार दाखल केलेले प्रकरण विनाकारण विभागीय आयुक्तांकडे पाठवले जात असून, अधिकारी नागरिकांना त्रास देत असल्याचा आरोप त्यांनी केला. यंत्रणेतील या मनमानी कारभारामुळे आणि समाजाच्या होत असलेल्या हेळसांडीमुळे मराठा समाजात तीव्र संताप उसळल्याचे त्यांनी स्पष्ट केले. तसेच, उपोषणाच्या भूमिकेवर ठाम राहत त्यांनी आपले पाणी, वैद्यकीय तपासणी आणि उपचारही बंद असल्याचे जाहीर केले.

हे ही वाचा : Vidyanand Bapat Interview : मारहाणीनंतर विद्यानंद बापट यांची भूमिका काय?

मराठा विद्यार्थ्यांचे नुकसान

या संकटादरम्यान मराठा विद्यार्थ्यांच्या शैक्षणिक भवितव्याचा गंभीर मुद्दाही त्यांनी ऐरणीवर आणला. एमबीबीएस प्रवेश प्रक्रियेत एका पात्र मुलीला तिची एसईबीसी पात्रता असूनही राज्य कोठ्यातून डावलून खुल्या प्रवर्गात टाकण्यात आल्याची खंत त्यांनी व्यक्त केली. प्रशासकीय पातळीवर जाणीवपूर्वक अशा चूका करून मराठा विद्यार्थ्यांचे नुकसान केले जात असल्याचा संताप त्यांनी व्यक्त केला. आरक्षणासंदर्भातील या तांत्रिक व प्रशासकीय त्रुटींमुळे विद्यार्थ्यांचे शैक्षणिक नुकसान होत असल्याचे त्यांनी निदर्शनास आणले.

हे ही वाचा : पुणे मेट्रो : विद्यानंद बापटांनी दिलेली FIR पहिल्यांदाच महाराष्ट्रासमोर

आंदोलन मोडून काढण्याचा हेतू

सरकारने कितीही प्रयत्न केले तरी हा लढा थांबणार नाही, असा इशारा जरांगे पाटलांनी दिला आहे. आंदोलनाला बदनाम करण्याचे किंवा ते मोडून काढण्याचे प्रयत्न सुरू असल्याचा आरोप करत त्यांनी राज्यकर्त्यांच्या भूमिकेवर प्रश्नचिन्ह उपस्थित केले. जोपर्यंत मराठा समाजाच्या मागण्या पूर्ण होत नाहीत, तोपर्यंत माघार घेणार नाही, अशी ठाम भूमिका घेत त्यांनी आपले उपोषण आणि सरकारविरुद्धचा संघर्ष तीव्र ठेवण्याचा निर्धार केला आहे.