एकतर्फी वाटत असलेली मुंबई महापालिकेत ट्वीस्ट, शेवटच्या 12 जागांसाठी मतमोजणी सुरु, धाकधूक वाढवणारी आकडेवारी

Mumbai Mahanagar Palika Election 2026 : मुंबई महानगरपालिका निवडणुकीच्या मतमोजणीदरम्यान शुक्रवारी संध्याकाळी राजकीय चित्र अचानक बदलताना दिसले. सकाळी 10 वाजता मतमोजणीला सुरुवात होताच भाजप आणि एकनाथ शिंदे गटाने सुरुवातीच्या फेऱ्यांत आघाडी घेतली होती. त्यामुळे ठाकरे बंधूंचे संख्याबळ 70 जागांच्या आतच मर्यादित राहील, असा अंदाज व्यक्त केला जात होता. दुपारपर्यंत भाजप 100 च्या पुढे मजल मारेल, अशी चर्चा रंगली होती. मात्र, मतमोजणी संथपणे सुरु असताना संध्याकाळपर्यंत संपूर्ण समीकरणच उलटले. भाजपची घोडदौड थांबली आणि 100 च्या जवळ पोहोचलेली संख्या घसरून थेट 84 वर आली, तर ठाकरे गटाने जोरदार पुनरागमन करत 57 वरून 63 जागांपर्यंत झेप घेतली.