एकाच कुटुंबातील तिघांची हत्या, शेजाऱ्याने कुटुंब झोपेत असतानाच 5 जणांवर कुऱ्हाड चालवली

पोलिसांनी दिलेल्या माहितीनुसार, ही घटना पहाटे सुमारे साडेचार वाजण्याच्या सुमारास बरमकेला ब्लॉकमधील झाल गावात घडली. कुंवर साय यांचे कुटुंब घरात झोपलेले असताना शेजारील नातेवाईक तुलसी सारथी (वय 26) हा हातात कुऱ्हाड घेऊन घरात शिरला आणि झोपलेल्या सदस्यांवर अंधाधुंद हल्ला चढवला. या हल्ल्यात दोन जणांचा घटनास्थळीच मृत्यू झाला, तर एका लहान मुलाचा रुग्णालयात नेत असताना वाटेतच मृत्यू झाला. उर्वरित जखमींवर तातडीने उपचार सुरू असून त्यांची प्रकृती चिंताजनक असल्याचे डॉक्टरांनी सांगितले.

हेही वाचा : बीड : माजलगावात दोन सख्ख्या बहिणींना जबरदस्तीने कारमधून नेण्याचा प्रयत्न, पण मुलींचा आवाज आला अन्...

प्राथमिक तपासात दोन्ही कुटुंबांमध्ये सुमारे पाच वर्षांपूर्वी झालेल्या वादातून वैर निर्माण झाल्याचे समोर आले आहे. त्या घटनेपासून दोन्ही बाजूंमध्ये मनमुटाव सुरू होता. आरोपी तुलसी सारथी हा गावाबाहेर एका हॉटेलमध्ये मजुरी करत होता आणि तीन दिवसांपूर्वीच तो गावात परतला होता. त्याचे वडील शौकीलाल यांनी सांगितले की, पहाटे चारच्या सुमारास तुलसी जंगलात जात असल्याचे सांगून घराबाहेर पडला. त्यानंतर काही वेळातच शेजारील घरातून आरडाओरड ऐकू आली. ग्रामस्थ घटनास्थळी पोहोचले असता सर्वत्र रक्ताचे थारोळे आणि जखमी अवस्थेतील कुटुंबीय पाहून त्यांचेही हृदय पिळवटून गेले.

घटनेची माहिती मिळताच डोंगरीपाली पोलिसांनी तात्काळ घटनास्थळी धाव घेतली. फॉरेन्सिक पथकासह वरिष्ठ अधिकारीही तपासासाठी दाखल झाले. वारदातीनंतर आरोपी पळून जाण्याच्या तयारीत होता; मात्र पोलिसांनी घेराबंदी करून त्याला अटक केली. या सामूहिक हत्याकांडानंतर झाल गावात भीती आणि शोककळा पसरली असून कायदा व सुव्यवस्था राखण्यासाठी अतिरिक्त पोलीस बंदोबस्त तैनात करण्यात आला आहे. घटनास्थळावरून पुरावे गोळा करण्याचे काम सुरू असून आरोपीला कठोर शिक्षा मिळावी यासाठी पोलिसांचा तपास वेगाने सुरू आहे.

इतर महत्त्वाच्या बातम्या 

पुणे : बिल्डरच्या फसवणुकीमुळे सेवानिवृत्त अधिकारी नैराश्यात, सातव्या मजल्यावरून उडी मारून संपवलं जीवन