Nagesh Patil Ashtikar : फुटीर खासदार नागेश पाटील आष्टीकर यांना शासनाकडून 'वाय प्लस' दर्जाची सुरक्षा प्रदान करण्यात आली आहे. या पार्श्वभूमीवर बोलताना त्यांनी सुरक्षेच्या मुद्द्यावरून विरोधकांवर जोरदार निशाणा साधला. ते म्हणाले की, शासनाने मला 'वाय प्लस' सुरक्षा दिली आहे हे जरी खरे असले, तरी प्रोटोकॉलनुसार मिळणारी पोलिसांची गाडी मी दैनंदिन प्रवासात कधीही वापरत नाही. फार तर गावातल्या गावात तात्पुरता वापर केला जातो, परंतु बाहेरगावी जाताना मी ही गाडी अजिबात वापरत नाही. मला आजही या सुरक्षेची फारशी आवश्यकता वाटत नाही, कारण समोरून येणाऱ्या कोणत्याही आव्हानाला जशास तसे उत्तर द्यायला आम्ही नेहमीच सक्षम आणि तयार आहोत.

...तर आमच्या वाटेला जाऊन दाखवावे

आपल्या आक्रमक शैलीत विरोधकांना इशारा देताना आष्टीकर पुढे म्हणाले की, गाफील असताना भविष्यात एखादी दुर्घटना घडलीच आणि कोणाच्या अंगात जास्तच मस्ती (किरमी) आली असेल, तर त्यांनी आमच्या वाटेला जाऊन दाखवावे. आमच्याशी खेटणाऱ्याला आम्ही अशी अद्दल घडवू की तो आयुष्यभर त्याची आठवण ठेवेल, यात तीळमात्र शंका नाही. विरोधकांचा समाचार घेताना त्यांनी थेट शब्दांत सुनावले की, केवळ उद्धव ठाकरेंचे पाहुणे आहात म्हणूनच तुम्हाला समाजात काहीतरी किंमत आहे. अन्यथा पाठीमागून लोक काय बोलतात आणि कशी वागणूक देतात, हे सर्वांना ठाऊक आहे. असे असताना तुम्ही आम्हाला मारण्याची भाषा करताच कशी, असा सवाल त्यांनी उपस्थित केला.

हे ही वाचा : पुणे : किल्ल्यावरुन सेल्फी काढताना पडला नाही, होणाऱ्या बायकोने गेम केल्याचा संशय अन्...

'स्वत: मैदानात या'

विरोधकांच्या धमक्यांना चॅलेंज देत आष्टीकर म्हणाले की, जर तुमच्यात खरोखरच हिंमत असेल, तर या लोकांना पुढे करण्याऐवजी स्वतः समोर या. ज्या कोणाला मला मारण्याची किंवा तुडवण्याची भाषा करायची आहे, त्यांनी स्वतः मैदानात येऊन दाखवावे. तुम्ही कुठेही आणि कधीही बोलवा, मी तिथे यायला पूर्णपणे तयार आहे. एकदा काय ते समोरासमोर होऊनच जाऊ दे, हे माझे तुम्हाला खुले आव्हान आहे. या संपूर्ण वादात माझ्या मुलाने विरोधकांना अत्यंत चोख आणि सडेतोड उत्तर दिले आहे. त्याच्या अंगात एवढी प्रगल्भता कुठून आली याचे मला आश्चर्य वाटते आणि त्याचा मला सार्थ अभिमानही आहे, असे कौतुकोद्गार त्यांनी या वेळी काढले.

हे ही वाचा : मुंबईची खबर : मुंबईकरांनो पुढील तीन तास महत्त्वाचे, जोरदार पाऊस बरसणार; अलर्ट जारी

'त्यांना फक्त माईक पाहिजे..'

शेवटी, संबंधित महिला नेत्याच्या टीकेचा समाचार घेताना आष्टीकर यांनी अत्यंत शेलक्या शब्दांत टोला लगावला. ते म्हणाले की, त्या बाईच्या निरर्थक प्रश्नांना उत्तरे देणे म्हणजे स्वतःच्याच पायावर दगड मारून घेण्यासारखे आहे. त्यांना केवळ प्रसिद्धीची भूक लागली आहे. अशा प्रकारची वादग्रस्त विधाने केली की प्रसारमाध्यमांचे माईक आपल्याकडे वळतात, हे त्यांना चांगलेच ठाऊक आहे. त्यांना फक्त आणि फक्त प्रसिद्धी (माईक) हवी आहे, त्यापलीकडे त्यांच्या बोलण्याला काहीही अर्थ नाही, असे म्हणत आष्टीकरांनी विरोधकांच्या टीकेची हवा काढून घेतली.