नाशिक : नवऱ्याने प्रेयसीसोबतचे अश्लील फोटो दाखवले, मासिक पाळी येत नसल्याने टोमणे; लग्नाच्या 6 महिन्यानंतर नवविवाहितेची आत्महत्या

भावाला सुसाईड नोटचे फोटो पाठवले अन्...

मिळालेल्या माहितीनुसार, महिलेने काल म्हणजेच बुधवारी (26 नोव्हेंबर) दुपारी 1 वाजताच्या सुमारास विष प्राशन केलं. त्यानंतर, तिच्या पतीने तिला रुग्णालयात सुद्धा नेलं मात्र, उपचारादरम्यान तिचा मृत्यू झाल्याचं डॉक्टरांनी सांगितलं. पीडित नेहाने आत्महत्या करण्यापूर्वी सात पानांची चिट्ठी लिहिली होती. इतकेच नव्हे तर, सासरचे लोक चिठ्ठी गायब करतील या भीतीने तिने तिच्या भावाला व्हॉट्सअॅपवरून सुसाईड नोटचे फोटो पाठवले होते. 

माहेरहून पैसे आणण्यासाठी दबाव 

पीडितेने केलेल्या आरोपानुसार, महिलेच्या माहरेच्या लोकांनी 15 लाख रुपये खर्च करून तिचं लग्न लावून दिलं होतं. मात्र, तरीसुद्धा तिला सासरचे लोक माहेरहून पैसे आणण्यासाठी दबाव आणायचे. इतकेच नव्हे तर, घरच्यांच्या सांगण्यावरून तिने तिच्या आई-वडिलांकडून 20 हजार रुपये आणि भावाची गाडी सुद्धा आणून दिली होती. पीडितेची मोठी फसवणूक झाल्याचं तिने चिट्ठीत लिहिलं. 

हे ही वाचा: मुंबई: "आईनेच त्याच्यासोबत मिळून मला वेश्या व्यवसायात ढकललं", मुलीने शिक्षिकेला सगळंच सांगितलं अन्...

पीडितेच्या चारित्र्यावर संशय 

महिलेने सुसाईड नोटमध्ये पतीवर आरोप करत लिहिलं की, "लग्नापूर्वी माझ्या नवऱ्याचे एका मुलीसोबत प्रेमसंबंध होते. इतकेच नव्हे तर नवऱ्याने तिला त्या मुलीचे अश्लील फोटो सुद्धा दाखवले होते. तसेच, माहेरी तुझा कोणी यार ठेवला असेल, म्हणून सारखी माहेरी जाते असं सतत बोलून माझा नवरा माझ्या चारित्र्यावर संशय घेत होता. नियमित मासिक पाळी येत नसल्याने सुद्धा सासरच्या लोकांनी खूप त्रास दिला. माझ्या माहेरच्या लोकांना सुद्धा माझ्याविरोधात भडकवण्यात आलं. लग्न झाल्यापासून नवऱ्याने मला दोनदा मारहाण केली. आजारी असतानाही माझ्याकडूव काम करून घ्यायचे. नणंदा टोमणे मारायच्या आणि नवऱ्याला तसेच सासूला माझ्याबद्दल खोटंनाटं सांगायच्या. लग्नानंतर नवऱ्याने देखील कौमार्य भंगाचे रक्त का आले नाही म्हणून संशय घेतला होता." असे नेहाने आपल्या सासरच्या लोकांवर गंभीर आरोप करत सुसाईड नोट लिहिली आहे.