गावातील तरुणाशी अनैतिक संबंध, संतापलेल्या पतीने पत्नीला पेट्रोल टाकून जिवंत जाळलं, वर्ध्यातील घटना

पोलिसांकडून मिळालेल्या माहितीनुसार, पीडित महिलेचे आणि आरोपी पतीचे लग्न काही वर्षांपूर्वी झाले होते. गेल्या काही महिन्यांपासून पती-पत्नीमध्ये सतत वाद सुरू होते. पत्नीचे गावातीलच एका तरुणाशी अनैतिक संबंध असल्याचा संशय पतीला होता. त्यामुळे दोघांमध्ये वारंवार वाद होत होते. गुरुवारी दुपारी दोघांमध्ये पुन्हा जोरदार भांडण झाले. संतापाच्या भरात आरोपी पतीने घरात ठेवलेले पेट्रोल आणले आणि पत्नीच्या अंगावर ओतले. काही कळायच्या आत त्याने पेट्रोलला आग लावली. क्षणार्धात ती महिला आगीच्या भक्ष्यस्थानी पडली. तिच्या आक्रोशाने परिसरात एकच खळबळ उडाली. दरम्यान, ती यामध्ये 80 टक्के भाजली असून तिला नागपूरच्या शासकीय रुग्णालयात हलविण्यात आले.

हेही वाचा : नंदुरबारमध्ये मोठी दुर्घटना, विद्यार्थ्यांना घेऊन जाणारी बस दरीत कोसळली, दृश्य पाहून अंगावर काटा

घटनेची माहिती मिळताच हिंगणघाट पोलिसांनी तातडीने घटनास्थळी धाव घेतली. पंचनामा करून आरोपी पतीला ताब्यात घेण्यात आले असून, त्याच्यावर भारतीय दंड विधानाच्या कलम 307 (खुनाचा प्रयत्न), 498-A (पत्नीवरील अत्याचार) आणि इतर संबंधित कलमांनुसार गुन्हा दाखल करण्यात आला आहे. सध्या पीडित महिला मृत्यूशी झुंज देत असून डॉक्टर तिच्यावर उपचार करत आहेत. पोलिस आरोपीचा पुढील तपास करीत आहेत. या घटनेमुळे वडनेर गावात आणि आसपासच्या परिसरात संतापाचे वातावरण निर्माण झाले आहे. कौटुंबिक वाद आणि संशय या कारणांमुळे एका महिलेवर जीवघेणा हल्ला झाल्याने नागरिकांमध्ये तीव्र नाराजी व्यक्त होत आहे.