UGC Net Exam : संशोधक विद्यार्थ्यांना झटका! नेट परीक्षा का करण्यात आली रद्द?

मेडिकल प्रवेश पूर्व परीक्षा 'नीट'वरून गोंधळ सुरू असतानाच आणखी एक राष्ट्रीय स्तरावरील परीक्षा रद्द करण्यात आली आहे. केंद्रीय शिक्षण मंत्रालयाकडून याबद्दल माहिती देण्यात आली. 

'एनटीए'कडून 18 जून रोजी यूजीसी नेट परीक्षा घेतली होती. 11 लाख विद्यार्थ्यांनी परीक्षेसाठी नोंदणी केली होती. तर 9 लाख विद्यार्थ्यांनी ही परीक्षा दिली होती. एका दिवसानंतरच परीक्षा रद्द करण्यात आली. 

नेट परीक्षा रद्द का करण्यात आली?

केंद्रीय शिक्षण मंत्रालयाने याबद्दलची माहिती दिली आहे. "19 जून 2024 रोजी विद्यापीठ अनुदान आयोगाला (UGC) केंद्रीय गृह मंत्रालया अंतर्गत येणाऱ्या भारतीय सायबर क्राइम कॉर्डिनेशन सेंटरच्या सायबर क्राइम शाखेकडून या परीक्षेबद्दल काही माहिती मिळाली होती. त्या माहितीतून प्राथमिक अंदाजानुसार संकेत मिळाले की, या परीक्षेत गडबड करण्यात आली आहे."