समलैंगिक संबंधाच्या नादात महाराष्ट्रातून थेट आग्र्याला पोहोचला, पण... 66 वर्षीय वृद्धाची चक्रावून टाकणारी कहाणी!

समलैंगिक संबंधांसाठी व्यावसायिक आग्र्यात पोहोचला अन्... 

पोलिसांनी दिलेल्या माहितीनुसार, पीडित व्यावसायिक हा 66 वर्षांचा असून महाराष्ट्रात त्याचा कपड्यांचा व्यवसाय आहे. त्या वृद्धाने गे-डेटिंग अॅप वापरायला सुरूवात केली आणि त्या माध्यमातून त्याने काही पुरुषांशी मैत्री केली. या अॅपच्या माध्यमातून पुरुषांशी संपर्कात आल्यानंतर, त्यांच्यातील मैत्री ही समलैंगिक संबंधांपर्यंत पोहोचली. त्यानंतर, त्यांनी भेटण्याची योजना आखली आणि आग्र्यात भेटण्याचं ठरवण्यात आलं. समलैंगिक संबंधांच्या नादात व्यावसायिक आग्र्यात पोहोचला. नंतर, शहरातील दरेसी परिसरातील हॉटेलमध्ये रूम बुक करण्यात आली. तो व्यावसायिक त्या पुरूषांसोबत बाहेर फिरण्यासाठी गेला आणि इथेच या प्रकरणाला वेगळं वळण मिळालं. या घटनेशी संबंधित सीसीटीव्ही फुटेज देखील समोर आलं आहे. 

सीसीटीव्ही फुटेजमध्ये व्यावसायिक कोणत्याही दबावाखाली न येता स्वत:च्या इच्छेने हॉटेलमधून बाहेर पडताना आणि कारमध्ये बसून आग्राहून हाथरसला निघताना दिसत आहे. मात्र, हाथरसला पोहोचताच पैशांच्या कारणावरून त्यांच्यात वाद झाला आणि हा वाद इतका टोकाला पोहोचला की त्या व्यावसायिकाकडून 1.20 लाख रुपये बँक खात्यात ट्रान्सफर करण्यात आले. इतकेच नव्हे तर, त्या वृद्धाची अंगठी आणि मोबाईल फोन सुद्धा घेण्यात आले. भीती, बदनामी आणि प्रकरण त्याच्या कुटुंबापर्यंत पोहोचण्याची शक्यता, या सर्वांमुळे पीडित वृद्धाला चुकीचा निर्णय घेण्यास भाग पाडलं. तो थेट आग्र्यात परतला आणि रात्री उशिरा एत्माद्दौला पोलिस ठाण्यात पोहोचला. 

हे ही वाचा: महाचावडी: '20 वर्षांचं भांडण सोडून जर मी एकत्र येऊ शकतो तर...', चावडीवर राज ठाकरे स्पष्टच बोलले!

पोलीस स्टेशनमध्ये पीडित वृद्धाने जे काही सांगितलं, त्यामुळे पोलिसांना सुद्धा मोठा धक्का बसला. काही अज्ञात लोकांनी त्याचं अपहरण केलं आणि त्याच्याकडून पैसे मिळाल्यानंतर, त्याला सोडून दिल्याचा दावा त्या वृद्धाने केला. प्रकरणाचं गांभीर्य लक्षात घेऊन डीसीपींच्या सूचनेच्या आधारे, पोलिसांची पथके तयार करण्यात आली आणि तपासादरम्यान, सीसीटीव्ही फुटेज, कॉल डिटेल्स आणि बँक ट्रान्झेक्शनवरून हे स्पष्ट झालं की कोणतंही अपहरण किंवा पीडित व्यक्तीवर बळजबरी करण्यात आली नव्हती. खरं तर, ज्या लोकांवर त्याने आरोप केले होते, त्याच लोकांसोबत तक्रारदार फिरण्यासाठी गेला होता.