बारामती: पोलिसांना पाहून पळून जाणं जीवावर बेतलं, ‘त्याला’ मृत्यूने गाठलं

अवैध दारू विक्री करत असल्याच्या संशयावरून धरपकड करत असताना पळून जाण्याचा प्रयत्न करणाऱ्या एकाचा व्यक्तीचा पाण्यात बुडून मृत्यू झाल्याची खळबळजनक घटना बारामती तालुक्यातल्या सोनगाव येथे घडली आहे. दरम्यान, वृद्ध झालेल्या व्यक्ती अपंग असून पोलिसांनी मारहाण केल्याने घाबरून पाण्यात उडी मारल्याचा आरोप मृतांच्या नातेवाईकांनी केला आहे.

मंगलेश उर्फ बहिऱ्या अशोक भोसले (वय 45 राहणार सोनगाव ता. बारामती जि. पुणे) असे मृताचे नाव आहे. या घटनेत पोलिसांवर देखील हल्ला झाल्याची माहिती समोर येत आहे. मात्र, पोलिसांनी याबाबतच्या वृत्ताला अद्याप कोणताही दुजोरा दिलेला नाही.

याबाबत मिळालेली माहिती अशी की, बारामती विभागीय पोलिस अधिकारी गणेश इंगळे यांच्या पोलीस पथकाने सोनगाव येथील पारधी वस्तीत सुरु असलेल्या अवैध दारू भट्टीवर छापेमारी केली. त्यावेळी अवैध दारू विक्री करणाऱ्या लोकांची धरपकड करत असताना मयत झालेला मंगलेश उर्फ अशोक भोसले याच्या दिशेने पोलीस धावले.