हे ही वाचा : मुंबई महापालिकेच्या निवडणुकीत मनसेच्या विजयी उमेदवारांना 74946 एकूण मतं, टक्केवारीसह अधिकृत माहिती

शिवसेना-मनसे असा भेदभाव नाही

मुंबई मनपा निवडणुकीत ठाकरे गटाची मनसेला खरंच मदत झाली का याविषयी उद्धव ठाकरेंनी प्रतिक्रिया दिली आहे. ते म्हणाले की, 'मनसेची आम्हाला मदत झाली आणि आमची मनसेला मदत झाली असं काही नाही. शिवसेना भवनचा वॉर्ड आम्ही मनसेला दिला होता. याठिकाणी त्यांचे उमेदवार निवडून आले आहेत. आम्ही ही निवडणूक एकदिलाने लढवली. दोन्ही पक्षातील कार्यकर्त्यांमध्येही एकवाक्यता होती. मी, आदित्य आणि आम्ही सगळे फिरलो त्या सर्व ठिकाणी शिवसेना आणि मनसे असा भेदभाव आम्हाला दिसला नाही. आम्ही एकदिलाने लढलो आहोत.'

पुढील निवडणुकांमध्ये मनसेसोबत राहणार का?

मनपा पराभवानंतर शिवसेना ठाकरे गट आणि मनसे पुढील निवडणुका एकत्रित लढणार का याविषयी देखील ठाकरेंनी भाष्य केले. 'मी राज ठाकरेंशी बोलेन आणि एकत्र राहायला काय हरकत आहे?' असंही ते म्हणाले. 'तसंच आम्ही एकत्र आलो आहोत ते एकत्र राहण्यासाठी' याचाही पुनरुच्चार त्यांनी केला. पराभवाचं विश्लेषण करण्यासाठी संयुक्त पत्रकार परिषदेची गरज नसल्याचंही ते म्हणाले. शिवसेनेच्या विभाजनाच्या बसलेल्या फटक्याविषयी बोलताना ते म्हणाले की, 'आमचे 54 जण फोडले होते तरीही आमचे 65 नगरसेवक निवडून आले. ही शिवसेनेची ताकद आहे. शिवसेना एक असती तर भाजपने आकाशपाताळ एक करुनही त्यांना महानगरपालिकेत यश मिळालं नसतं.'