ड्रग्स प्रकरणातील आरोपीकडून भाजप मंत्र्यांचं स्वागत, बावनकुळे म्हणतात.. 'वाजवा टाळ्या' त्या Video ची A टू Z स्टोरी

महसूलमंत्री चंद्रशेखर बावनकुळे गुरुवारी तुळजापूर दौऱ्यावर होते. निमित्त होतं आमदार राणा जगजीत सिंह पाटील यांच्या नागरी सत्कार सोहळ्याचं. तुळजापूरच्या तीर्थक्षेत्र विकासासाठी मंजूर झालेल्या 1866 कोटी रुपयांच्या विकास आराखड्यानिमित्त नागरी सत्कार सोहळा आयोजित करण्यात आला होता आणि कार्यक्रमाचं आयोजन केलं होतं विनोद उर्फ पिंटू गंगणेनं..

हे ही वाचा>> ड्रग्स तस्कर ललित पाटीलच्या कशा आवळल्या मुसक्या?, पोलिसांनी सांगितली Inside Story

ड्रग्ज तस्करी प्रकरणातील सशर्त जामिनावर असलेल्या आरोपी विनोद उर्फ पिंटू गंगणे मंत्री आणि आमदारांसोबत व्यासपीठावर रुबाबात मिरवत होता.. आरोपी महसूल मंत्र्यांचा जाहीर सत्कार करत होता आणि स्वत: मंत्री बावनकुळे या गंगणेच्या पाठीवर कौतुकाची थाप देत उपस्थितांना टाळ्या वाजवायला सांगत होते.

भाजप नेत्यांसोबत जामिनावर असलेल्या आरोपीचा हा व्हिडीओ हा हा म्हणता धाराशिवसह राज्यभरात पसरला. त्यानंतर सुरु झाला धाराशिवमध्ये पारंपारिक प्रतिस्पर्ध्यांमध्ये थेट सामना. खासदार ओमराजे निंबाळकरांनी थेट राणा पाटलांवर निशाणा साधला.

कोण आहे विनोद उर्फ पिंटू गंगणे?

तुळजापुर ड्रग्ज प्रकरणावरुन धाराशिवमध्ये हा वाद सुरु आहे. पण ज्याच्यामुळे हा सगळा कलगीतुरा रंगलाय तो विनोद उर्फ पिंटू गंगणे कोण तरी कोण हे आपण जाणून घेऊया.

पिंटू गंगणे हा तुळजापुर ड्रग्ज प्रकरणातला प्रमुख आरोपी आहे. दोषारोप पत्रानुसार गंगणे ड्रग्स प्रकरणातील आरोपी आहे. त्याला 7 जूनला अटक करण्यात आली होती. 6 दिवसांच्या पोलीस कोठडीनंतर त्याला 12 जून रोजी न्यायालयीन कोठडी सुनावत धाराशिव जेलमध्ये पाठवण्यात आलं होतं. छत्रपती संभाजीनगर उच्च न्यायालयाने 10 जुलैला काही अटींवर सशर्त जामीन मंजूर केला. त्यामुळे सध्या तो तुरुंगाबाहेर आहे.

हे ही वाचा>> पुण्यातील बुधवार पेठेत वेश्या व्यवसायाच्या नावाखाली सुरू होतं भलतंच...

​​​​​​​पिंटू गंगणेची तुळजापुरातला मटका किंग म्हणून ओळख आहे... मटका,मारामारी, नगरपालिका घोटाळा यासह जवळपास असे अनेक गुन्हे गंगणेंसह पत्नीवर दाखल आहेत. पिंटू गंगणे हा 2004 पासून सक्रिय राजकारणात असून आतापर्यंत त्याच्या घरातच कायम नगरसेवकपद असतं. पिंटू गंगणेची पत्नी अर्चना गंगणे तुळजापूर नगराध्यक्षा होत्या. तुळजापरात यांचा मोठा गट कार्यरत आहे. त्याचे बंधू विजय गंगणे तुळजापूर कृषी उत्तन्न  बाजार समितीचे सभापती आहेत. गंगणे आणि राणा पाटलांचे आधीपासून राजकीय संबंध होते अशी चर्चा आहे. 2019 पासून राणा पाटील तुळजापूरचे आमदार आहेत तेव्हापासून पिंटू गंगणे आणि त्याचा गट अधिक जवळ आला. मोठा गट असल्यानं राणा पाटलांनी गंगणेला जवळ केल्याची चर्चा आहे.

तुळजापूर ड्रग्ज प्रकरण नेमकं काय आहे?

तुळजापूर ड्रग्ज तस्करी प्रकरण 14 फेब्रुवारी 2025 रोजी उघडकीस आलं. या प्रकरणात एकूण 38 आरोपी असून 28 आरोपी तस्कर गटात तर 10 जण सेवन गटातले आहेत. 28 जण अटकेत असून अजून 10 आरोपी फरार आहेत. 14 आरोपींच्या अनुषंगाने 10 हजार 744 पानांचे दोषारोपपत्र 16 एप्रिल रोजी धाराशिव कोर्टात दाखल केलं होतं. ड्रग्ज कसं आले, कुणी रॅकेट उभं केलं, या आरोपींच्या मागे कुणाचं पाठबळ होतं? मुंबईवरुन सोलापूरमार्गे तुळजापुरात ड्रग्ज कुणामार्फत आणलं जात होतं? यासह अनेक प्रश्न अनुत्तरीत आहेत. 

आता धाराशिवचे पालकमंत्री प्रताप सरनाईक या ड्रग्ज प्रकरणावरुन प्रचंड आक्रमक झाले आहेत. 15 ऑगस्टपर्यंत फरार आरोपींना अटक करण्यासह जामिनावरील आरोपींची कसून चौकशी करा. आरोपींना मकोका लावा असा अल्टिमेटम सरनाईकांनी पोलिसांना दिला आहे. धाराशिवचे आमदार कैलास पाटलांनी या तुळजापूर ड्रग्ज प्रकरणावरच बजेट अधिवेशनात लक्षवेधी मांडली होती. पण ही लक्षवेधी मांडण्याआधीच लिक झाली होती. 

महसूलमंत्री बावनकुळेंनी या लक्षवेधी लीकबाबत बोलताना चौकशी करु असे सांगितले होते. त्यानंतर ज्या प्रकरणावर मंत्री विधीमंडळात चौकशीचं आश्वासन देत होते त्याच तुळजापूर ड्रग्ज प्रकरणातील सशर्त जामिनावर असलेला प्रमुख आरोपी विनोद उर्फ पिंटू गंगणे आमदार राणा पाटलांसमोर बावनकुळेंचा सत्कार करता होता आणि मंत्री बावनकुळे म्हणत होते विनोदसाठी टाळ्या वाजवा.