इस्लाम धर्म स्वीकार, गर्लफ्रेंडचा धर्मांतरासाठी दबाव, सांगलीतील तरुणाची आत्महत्या
Sangli Crime News : सांगलीतील 19 वर्षीय दुर्वांक शेवालेच्या आत्महत्येनंतर कुटुंबियांनी धर्मांतराच्या दबावाचे आरोप केले आहेत.. न्याय न मिळाल्यास आत्महत्या करण्याचा इशारा कुटुंबीयांनी दिला आहे.
ADVERTISEMENT
बातम्या हायलाइट
इस्लाम धर्म स्वीकार, गर्लफ्रेंडचा धर्मांतरासाठी दबाव
तरुणाचा टोकाचा निर्णय
Sangli Crime News : सांगलीतील खणभाग परिसरात राहणाऱ्या 19 वर्षीय दुर्वांक शेवाले या तरुणाने राहत्या घरी गळफास घेऊन आत्महत्या केल्याची घटना समोर आली आहे. दुर्वांक पुण्यातील एका कंपनीत काम करत होता. आत्महत्येनंतर शहर पोलिसांनी आवश्यक पंचनामा आणि तपासाची प्रक्रिया पूर्ण करून शवविच्छेदनानंतर मृतदेह कुटुंबीयांच्या ताब्यात दिला. पुढील तपासासाठी पोलिसांनी दुर्वांकचा मोबाईल जप्त केला होता. मात्र, सुरुवातीला मोबाईलमध्ये कोणतीही आक्षेपार्ह बाब आढळून आली नसल्याचे पोलिसांनी कुटुंबीयांना सांगितले. त्यानंतर कुटुंबीयांना संशय आल्याने त्यांनी दुर्वांक सांगलीत आल्यानंतर अधूनमधून वापरत असलेला त्याच्या आईचा मोबाईल तपासला. त्या मोबाईलमधील चॅटमधून धक्कादायक माहिती समोर आल्याचा दावा कुटुंबीयांनी केला आहे.
"समू, मी आत्महत्या करत आहे," दुर्वांकचा तो व्हिडीओ पोलिसांना सापडला
कुटुंबीयांच्या म्हणण्यानुसार, दुर्वांकचे कोल्हापूर येथील मूळ रहिवासी असलेल्या आणि अधूनमधून सांगलीत नातेवाईकांकडे येणाऱ्या एका मुस्लिम तरुणीसोबत प्रेमसंबंध होते. संबंधित तरुणी त्याच्यावर इस्लाम धर्म स्वीकारण्यासाठी दबाव टाकत असल्याचे चॅटमधून दिसून आल्याचा आरोप करण्यात आला आहे. दरम्यान, पोलिसांनी चार्जिंगसाठी दुर्वांकचा मोबाईल कुटुंबीयांकडे परत दिल्यानंतर तो तपासला असता आत्महत्येपूर्वी रेकॉर्ड करण्यात आलेला एक व्हिडीओ त्यामध्ये आढळल्याचा दावा करण्यात आला. त्या व्हिडीओमध्ये दुर्वांक "समू, मी आत्महत्या करत आहे," असे म्हणताना ऐकू येत असल्याचे कुटुंबीयांचे म्हणणे आहे. त्यामुळे मोबाईलमध्ये काहीही आढळले नसल्याचा पोलिसांचा दावा आणि नंतर मिळालेला व्हिडीओ यामुळे तपासाच्या पद्धतीवर प्रश्न उपस्थित होत आहेत.
