मालाडमध्ये मेट्रोच्या कामासाठी झोपड्या पाडल्या, विरोध करणारे BJP MLA अतुल भातखळकरांना अटक

मालाड कुरार येथे MMRDA कडून कुरार मेट्रो स्टेशनच्या कामासाठी काही झोपड्यांवर कारवाई करण्यात येत आहे. रात्री १२ वाजता या झोपडपट्टीवासियांना नोटिसा दिल्यानंतर आज सकाळीच पोलिसांच्या लवाजम्यासह ही कारवाई करायला सुरुवात झाली. त्यामुळे स्थानिकांमध्ये एकच खळबळ उडाली असून नागरिकांनी रस्त्यावर उतरून या तोडक कारवाईला विरोध केला आहे.

ठाकरे सरकारची मोगलाई…
शुक्रवारी रात्री १२ वाजता नोटिसा देऊन आज सकाळी ९ च्या आधीच प्रचंड पोलीस बंदोबस्त लावून झोपड्यांवर कारवाई करण्यात आली. भर पावसात कारवाई सुरू करण्यात आली. लोकांना मारहाण करत घराच्याबाहेर काढलं. आम्ही त्याला विरोध केला. त्यामुळे आम्हाला ताब्यात घेतलं.

— Atul Bhatkhalkar (@BhatkhalkarA) July 17, 2021

दरम्यान स्थानिक आमदार अतुल भातखळकरांनी घटनास्थळी धाव घेत या कारवाईला विरोध केला. हायकोर्टाने कोविड काळात घरे तोडण्यासाठी मनाई केलेली असतानाही पोलिसांनी बळजबरीने कारवाई केली. चमकोगिरी करण्यासाठी मराठी माणसाला भर पावसात घराबाहेर करणाऱ्या मुख्यमंत्री उद्धव ठाकरेंना जनता लक्षात ठेवेल असा इशाराही अतुल भातखळकर यांनी दिला आहे.

कुरारची कारवाई, ठाकरे सरकारचा अत्याचारी चेहरा दाखवणारी… हायकोर्टाने कोविड काळात घरे तोडण्यास मनाई केली आहे. तरीही पोलिसांनी बेकायदेशीरपणे बळजबरी करून तोडक कारवाई केली.
आम्ही सोमवारी पोलीस आणि इतरांविरोधात कोर्टाचा अवमान केल्याची याचिका दाखल करू.

— Atul Bhatkhalkar (@BhatkhalkarA) July 17, 2021

दरम्यान कोविड काळात घर तोडण्यास हायकोर्टाने मनाई केलेली असतानाही कुरारवासियांवर ही कारवाई करण्यात आली. याविरोधात आपण कोर्टात जाणार असल्याचं भातखळकरांनी स्पष्ट केलंय. मला अटक करुन हा लढा थांबणार नाही. विरोध करणाऱ्या स्थानिकांना पोलिसांनी नग्न करुन मारहाण केली. स्थानिकांना योग्य घरं मिळाली पाहिजेत, तोपर्यंत आमचा लढा सुरुच राहिलं असंही भातखळकर म्हणाले.