Rohit Patil: शरद पवार की अजित पवार.. R. R. पाटलांचा मुलगा कोणाच्या बाजूने?

आर. आर. पाटलांचे सुपुत्र रोहित पाटील नेमकं कोणाच्या बाजूने?

दरम्यान, अजित पवारांच्या बंडानंतर राज्याच्या दौऱ्यावर निघण्यापूर्वी शरद पवार हे आज (3 जुलै) कराडमध्ये यशवंतराव चव्हाण यांचे स्मृतीस्थळ असलेल्या प्रीती संगमावर दाखल झाले आहेत. याठिकाणी शरद पवारांना पाठिंबा देण्यासाठी राष्ट्रवादी काँग्रेसचे दिवंगत नेते आणि माजी गृहमंत्री आर.आर. पाटील यांचा मुलगा रोहित पाटील प्रीतीसंगमावर दाखल झाला होता.

हे ही वाचा >> NCP : अजित पवारांच्या बंडाची स्क्रिप्ट लिहिली गेली होती एप्रिलमध्येच?

सध्या राष्ट्रवादीत कोण नेते कोणत्या पवारांच्या पाठिशी आहे याबाबत जोरदार चर्चा सुरू आहे. असं असताना रोहित पाटील हे शरद पवारांसोबतच प्रीती संगमावर पोहचल्याने ते नेमके कोणाच्या पाठिशी आहेत असा जेव्हा त्यांना प्रश्न विचारण्यात आला तेव्हा रोहित पाटील म्हणाले की, ‘आपली निष्ठा शरद पवारांच्या चरणीच आहे.’

‘अजित पवारांच्या निर्णयामुळे फार फरक पडणार नाही, पक्ष पुन्हा…’

‘आज गुरुपौर्णिमा असल्याने आम्ही नव्या महाराष्ट्राच्या निर्मितीत मोठा वाटा असलेल्या यशवंतराव चव्हाण यांच्या स्मृतीस्थळाचे दर्शन घेण्यासाठी आलो आहोत. शरद पवार हे यशवंतराव चव्हाण यांच्या मुशीत घडले आहेत. राष्ट्रवादी काँग्रेसमध्ये जे काही घडलं ते अपेक्षित नव्हते. हा सर्वसामान्य कार्यकर्त्यांसाठी मोठा धक्का होता.’

हे ही वाचा >> Maharashtra Politics Live Updates : अजित पवारांचं बंड, शरद पवार मैदानात!

‘परंतु, राष्ट्रवादी काँग्रेस पक्ष हा पवार साहेबांच्या निर्णयांमुळे, धोरण आणि विचारधारेमुळे तळागाळापर्यंत पोहोचला आहे. त्यामुळे काल जे काही घडले त्याने फार फरक पडेल, असे वाटत नाही. राष्ट्रवादी काँग्रेस पक्ष पु्न्हा सर्वसामान्यांच्या ताकदीवर उभारी घेईल. आम्ही पवार साहेबांच्या सोबत आहोत. त्यांना पाठिंबा देण्यासाठीच आम्ही याठिकाणी आलो आहोत.’ असे रोहित पाटील यांनी म्हटले.

एकीकडे अजित पवार हे आपला राजकीय खुंटा बळकण्यासाठी सर्वस्व पणाला लावत आहेत. तर दुसरीकडे आजवर अनेक राजकीय वादळांना परतवून लावणारे शरद पवार त्याच ताकदीने मैदानात उतरले आहेत. अशावेळी कोणते पवार बाजी मारणार याकडे अवघ्या महाराष्ट्राचं लक्ष लागून राहिलं आहे.