अजित पवारांकडे अर्थ खातं पण प्रत्येक फाईल जाणार फडणवीसांकडे?, नेमकं राजकारण काय?

अजित पवारांना हे मान्य होईल?

वित्त विभागाच्या फाईल्स अजित पवारांकडून थेट मुख्यमंत्र्यांकडे मान्यतेसाठी जाणार नाहीत. त्या आधी उपमुख्यमंत्री देवेंद्र फडणवीस यांना दाखवण्यात येतील असं ठरवण्यात आल्याचं आता समोर आलं आहे. या वृत्तानुसार, अजित पवारांना वित्त खातं देताना झालेल्या वाटाघाटीनुसार अजित पवारांकडून वित्त विभागाच्या ज्या फाईल्स शिंदेंकडे जातील त्या सर्व उपमुख्यमंत्री देवेंद्र फडणवीस यांच्या माध्यमातून जातील.

अजित पवार निधी देताना राष्ट्रवादीच्या आमदारांना बळ देतील अशी भीती शिंदे आणि भाजपच्या आमदारांनी बोलून दाखवली होती. त्यामुळे अजितदादांना वित्त खातं देऊ नये अशी मागणी देखील करण्यात आली होती. त्यामुळे यातून मार्ग काढण्यासाठी हा फॉर्म्युला ठरवण्यात आल्याचं बोललं जातं आहे.

हे ही वाचा >> ‘ही सगळी बंडलबाजी’; अशोक चव्हाणांचा एकनाथ शिंदे-अजित पवारांना ‘डोस’

दरम्यान, आता जो पर्याय शोधण्यात आला आहे तो अजित पवार यांना मान्य होईल का? अशीही चर्चा आता राजकीय वर्तुळात सुरू आहे. अजित पवार म्हणजे रोखठोक व्यक्तिमत्व अशी ओळख अवघ्या महाराष्ट्राला आहे. अशावेळी आता बाणेदार अजित पवारांना त्यांच्याकडील फाईल्स देवेंद्र फडणवीसांकडे जाणं मान्य होईल का? हे पाहणं महत्त्वाचं ठरणार आहे.

हे ही वाचा >> ‘तेव्हा दुतोंडी साप जहर का ओकत होते?’, फडणवीसांना शिवसेनेचा (UBT) सवाल

‘अजित पवारांची प्रत्येक फाईल देवेंद्र फडणवीसांच्या नजरेखालून जाईल’

याला आता शिवसेनेचे मंत्री गुलाबराव पाटील यांनी देखील दुजोरा दिला आहे. ते म्हणाले, ‘आता सत्तेत तीन वाटेकरू झाले आहेत. अजित पवार हे मातब्बर नेते असल्यामुळे त्यांना सन्मानाचं खातं देणं गरजेचं होतं’, असं मत पाणीपुरवठा मंत्री गुलाबराव पाटलांनी व्यक्त केलं आहे. ‘अर्थ खातं जरी अजित पवारांकडे असलं तरी आता मागच्या काळासारखं होणार नाही. अर्थ खात्याकडे येणारी प्रत्येक फाईल मुख्यमंत्री आणि उपमुख्यमंत्र्यांच्या नजरेखालून जाणार आहे. त्यामुळे मागच्या काळात जे असंतुलित काम झालं होतं, ते या काळात होणार नाही. त्यामुळे मागच्या काळात जे गैरसमज झाले होते, ते कामाच्या रूपाने बाहेर येतील.’ हा निर्णय योग्य असल्याचं गुलाबराव पाटील म्हणाले. यावेळी त्यांनी अजित पवारांकडे अर्थ खाते देण्यात आल्याचं समर्थनही केलं आहे.

त्यामुळे या नव्या फॉर्म्युल्यामुळे शिंदे आणि भाजपच्या आमदारांच्या तक्रारी थांबणार का हे पाहणं महत्त्वाचं असणार आहे.