PM Modi : टायगर प्रिंटेड शर्ट, काळी टोपी अन्… पंतप्रधान मोदींचा जंगल सफारीनिमित्त खास लुक

प्रोजेक्ट टायगरला 50 वर्षे पूर्ण झाल्याच्या निमित्ताने हा दौरा आयोजित करण्यात आला होता. पंतप्रधान मोदींनी कॅमेऱ्यातून अनेक छायाचित्रे येथे क्लिक केली. त्यांनी स्वत:च्या हाताने हत्तीला ऊस खाऊ घातला आणि दुर्बिणीच्या साहाय्याने दृश्यांचा आनंदही घेतला. पंतप्रधान मोदींनी मुदुमलाई व्याघ्र प्रकल्पातील थेप्पाकडू हत्तींच्या छावणीलाही भेट दिली. हा तोच एलिफंट कॅम्प आहे जिथे ऑस्कर विजेत्या ‘द एलिफंट व्हिस्पर्स’ चित्रपटातील रघू देखील राहतो. ‘द एलिफंट व्हिस्पर्स’ हा भारतातील पहिला डॉक्युमेंटरी आहे, ज्याला ऑस्कर पुरस्कार मिळाला आहे. येथे पंतप्रधान मोदींनी बेली आणि बोमन या आदिवासी जोडप्याची भेट घेतली ज्यांनी रघू या हत्तीच्या मुलाला वाढवले.

यानंतर पंतप्रधान मोदी इथून म्हैसूरला पोहोचले आणि प्रोजेक्ट टायगरला 50 वर्षे पूर्ण झाल्याबद्दल स्मरण कार्यक्रमाचे उद्घाटन केले. व्याघ्र संवर्धनासाठी अमृत कालचे व्हिजन आणि स्मारक नाणेही त्यांनी जारी केले. पंतप्रधान मोदींनी या काळात 2022 व्याघ्रगणना प्रसिद्ध केली. वाघांची संख्या 3167 झाली असल्याचे सांगण्यात आले. 2018 च्या जनगणनेमध्ये वाघांची संख्या 2,967 असल्याचे सांगण्यात आले होते. यापूर्वी ही संख्या 2014 मध्ये 2226, 2010 मध्ये 1706 आणि 2006 मध्ये 1411 होती.

कार्यक्रमाला संबोधित करताना पीएम मोदी म्हणाले की, भारतातून अनेक दशकांपूर्वी चित्ता नामशेष झाले होते, आम्ही नामिबिया आणि दक्षिण आफ्रिकेतून भव्य चित्ते भारतात आणले. कुनो नॅशनल पार्कमध्ये काही दिवसांपूर्वी 4 सुंदर पिल्लांनी जन्म घेतला आहे. भारताने केवळ वाघाचेच रक्षण केले नाही तर त्यांना उत्कर्षासाठी एक उत्कृष्ट इको सिस्टीमही दिली आहे. ते म्हणाले की, ऑस्कर मिळालेल्या एलिफंट व्हिस्पर्स डॉक्युमेंटरीमध्ये निसर्ग आणि प्राणी यांच्यातील अद्भुत नातेसंबंधाचा वारसाही दिसून येतो. आदिवासी समाजाच्या जीवनातून आणि परंपरेतून देशासाठी आणि समाजासाठी काहीतरी घ्यावे, असे आवाहन त्यांनी केले.

प्रोजेक्ट टायगर म्हणजे काय?

वाघांच्या घटत्या लोकसंख्येचे संरक्षण करण्यासाठी 1 एप्रिल 1973 रोजी भारतात प्रोजेक्ट टायगर सुरू करण्यात आला. सुरुवातीला 18,278 चौरस किमीमध्ये पसरलेल्या 9 व्याघ्र प्रकल्पांचा या योजनेत समावेश करण्यात आला होता. गेल्या 50 वर्षांत या योजनेचा विस्तार झाला असून आज त्यांची संख्या 53 झाली आहे. हे 53 व्याघ्र प्रकल्प 75,500 चौरस किमीमध्ये पसरलेले आहेत. इंदिरा गांधी सरकारमध्ये सुरू झालेल्या प्रोजेक्ट टायगरचे पहिले संचालक कैलाश सांखला होते.कैलासला ‘द टायगर मॅन ऑफ इंडिया’ असेही म्हटले जाते. वाघांप्रती असलेले त्यांचे समर्पण पाहून त्यांना प्रोजेक्ट टायगरचे पहिले संचालक बनवण्यात आले.

कर्नाटकात 10 मे रोजी निवडणूक होणार आहे

कर्नाटकात निवडणुका तोंडावर आल्या आहेत. तेथे 10 मे रोजी निवडणूक होणार असून, त्याचे निकाल 13 मे रोजी लागणार आहेत. निवडणुकीच्या पार्श्वभूमीवर पीएम मोदींचा हा दौरा विशेष मानला जात आहे. कर्नाटक काँग्रेसचे ज्येष्ठ नेते सिद्धरामय्या यांनी पंतप्रधानांच्या या भेटीवर प्रश्न उपस्थित केले आहेत. आचारसंहिता पंतप्रधान, मुख्यमंत्री, मंत्री किंवा आमदार असोत सर्वांना समान लागू होते, असे त्यांनी दौऱ्यापूर्वी सांगितले होते.

SC ला वाघांची संख्या सांगितली

यापूर्वी जानेवारी 2023 मध्ये केंद्र सरकारने सर्वोच्च न्यायालयाला सांगितले होते की देशातील 53 व्याघ्र प्रकल्पांमध्ये 2,967 वाघ आहेत. 2018 च्या अहवालाचा हवाला देऊन ही आकडेवारी देण्यात आली आहे. धोक्यात असलेल्या वाघांच्या संरक्षणासाठी 2017 च्या याचिकेवर न्यायालयात सुनावणी सुरू होती.

घटत्या लोकसंख्येमागे शिकार हे प्रमुख कारण आहे

वाघाला अजूनही ‘धोकादायक’ म्हणून वर्गीकृत केले जाते. वाघ 93 टक्क्यांपर्यंत कमी झाले आहेत आणि वाघांची संख्या शतकापूर्वी 100,000 वरून कमी झाली आहे. शिकार आणि अधिवासाचा नाश ही प्रमुख कारणे आहेत.

इंदिरा गांधींचा बछड्यासोबतचा फोटो, काँग्रेसने नरेंद्र मोदींना व्याघ्र सफारीवरून घेरलं