पंकजा मुंडेंना अश्लील मेसेज; बीडच्या पोराला पुण्यात पकडलं, प्रकरण नेमकं काय?

पंकजा मुंडेंना अश्लील मेसेज करणाऱ्या आरोपीच्या मुसक्या आवळल्या

या प्रकरणात आरोपीला दोन दिवसांची पोलीस कोठडी सुनावण्यात आली आहे. महाराष्ट्र पोलीस नोडल सायबर पोलिसांनी अमोलच्या मुसक्या आवळल्या आहेत. एका मीडिया रिपोर्टनुसार, आरोपी हा गेल्या काही दिवसांपासून फोनवरून पंकजा मुंडेंना अश्लील मेसेज आणि फोनद्वारे सतावत होता. यामुळे पंकजा मुंडेंच्या कार्यालयातून सायबर पोलिसांकडे तक्रार दाखल करण्यात आली होती. ज्यानंतर सायबर गुन्हे शाखेने तात्काळ कारवाई करत आरोपीला अटक केली. 

हे ही वाचा >> बीडमध्ये दारूसाठी मुलानं 72 वर्षांच्या आईच्या डोक्यात दगड घातला, गाव हादरलं... तपासात काय आढळलं?

पोलिसांनी या प्रकरणात कलम 78 व कलम 79 आयटी कायद्यांतर्गत गुन्हा दाखल केला आहे. तसंच पोलिसांनी या प्रकरणाचा आता सखोल तपास देखील सुरू केला असल्याचे सांगण्यात येत आहे. सायबर पोलिसांनी भोसरी पोलिसांच्या मदतीने अमोल काळेच्या मुसक्या आवळल्या आहेत.

आरोपी अमोल काळे याला अटक केली. चौकशीत काळेने पंकजा मुंडे यांना फोन केल्याची कबुली दिली. अमोल काळेला न्यायालयात हजर करण्यात आले असता न्यायालयाने त्यांना दोन दिवसांची पोलिस कोठडी सुनावली. एका सायबर अधिकार्‍याने सांगितले की, आरोपी हा विद्यार्थी आहे आणि त्याने अपशब्द वापरण्यामागील आणि त्रासदायक वर्तनामागील हेतू सध्या तपासला जात आहे. 

दरम्यान, आरोपी अमोलला पुणे शहरातील भोसरी येथे जरी अटक करण्यात आली असली, तरीही तो बीड जिल्ह्यातील परळीतील असल्याची माहिती समोर येत आहे. या प्रकरणात पोलीस पुढील तपास करत आहेत.

अमोल काळेच्या मागे नेमका आका कोण? 

गुन्हेगारींच्या घटनांमुळे बीड चर्चेत आले आहे. याच बीडमधील अमोल काळेच्या मागे आता आणखी कोणी आका आहे का? असा प्रश्न उपस्थित होताना दिसतो. याआधी बीड गुन्हेगारीच्या प्रकरणामुळे चर्चेत आले होते. मात्र, आता पंकजा मुंडेंना बीडच्याच व्यक्तीकडून येणाऱ्या सततच्या फोन आणि अश्लील मेसेजेसमुळे चर्चेत आले आहे. यामागे काहीतही काळंबेरं असल्याचा संशय निर्माण होतो. मात्र, या संबंधित प्रकरणात पोलीस पुढील तपास करत आहे.