Maharashtra New CM: मोठी बातमी! भाजपकडून थेट शपथविधीची तारीख जाहीर, पण मुख्यमंत्री...
भाजपकडून अद्याप महाराष्ट्राचा नवा मुख्यमंत्री कोण याची माहिती देण्यात आलेली नसली तरी आता नव्या सरकारच्या शपथविधी तारीख आणि वेळ मात्र घोषित करण्यात आली आहे.
ADVERTISEMENT
बातम्या हायलाइट
महायुतीच्या सरकारचा शपथविधी ठरला
पाहा नव्या सरकारचा शपथविधी कुठे होणार
भाजप प्रदेशाध्यक्ष चंद्रशेखर बावनकुळेंनी दिली माहिती
मुंबई: महाराष्ट्राचा नवा मुख्यमंत्री कोण? हे अद्यापही गुलदस्त्यात आहे. पण दुसरीकडे नव्या मुख्यमंत्र्यांचा आणि सरकारचा शपथविधी सोहळ्याची तारीख नुकतीच जाहीर करण्यात आली आहे. भाजपचे प्रदेशाध्यक्ष चंद्रशेखर बावनकुळे यांनी ट्विटरवरून नव्या सरकारच्या शपथविधीची माहिती दिली आहे. (who will be the maharashtra new chief minister is still in the bag but the bjp has announced the date, time and venue of the swearing in ceremony)
23 नोव्हेंबर रोजी विधानसभा निवडणुकीचा निकाल हा जाहीर झाला. पण अद्यापही मुख्यमंत्री कोण होणार याची अधिकृत घोषणा करण्यात आलेली नाही. असं असताना चंद्रशेखर बावनकुळे यांनी थेट शपथविधीची तारीख, वेळ आणि ठिकाणच जाहीर केलं आहे.
हे ही वाचा>> Maharashtra CM: कोण होणार राज्याचा मुख्यमंत्री? फडणवीस की मोहोळ? 'या' तारखेला उधळणार गुलाल!
'इथे' होणार नव्या सरकारचा शपथविधी
राज्यातील महायुती सरकारचा शपथविधी विश्वगौरव माननीय पंतप्रधान श्री. नरेंद्र मोदीजी यांच्या उपस्थितीत गुरुवार, दि. ५ डिसेंबर २०२४ रोजी संध्याकाळी ५ वाजता आझाद मैदान, मुंबई येथे संपन्न होणार आहे.
अशी माहिती चंद्रशेखर बावनकुळे यांनी ट्विटरवरुन दिली आहे.
हे ही वाचा>> Eknath Shinde यांची तब्येत बिघडली! नेमकं होतंय तरी काय?
एकनाथ शिंदेंना हवं गृहमंत्री पद?
दरम्यान, विधानसभा निवडणुकीचा निकाल 23 नोव्हेंबरला जाहीर झाल्यानंतर देखील आठवडा उलटला तरीही नवं सरकार स्थापन होऊ शकलेलं नाही. यामुळे विरोधकांनी महायुतीवर टीका करणं सुरू केलं आहे.
मात्र, या सगळ्यामध्ये एकनाथ शिंदे यांची नाराजी हे मोठं कारण असल्याचं बोललं जात आहे. सुरुवातीला एकनाथ शिंदे हे मुख्यमंत्री पदासाठी आग्रही होते. पण निकालाच्या चार दिवसानंतर त्यांनी पत्रकार परिषद घेऊन आपण भाजप ठरवेल त्या मुख्यमंत्र्याला पाठिंबा देऊ असं जाहीर केलं.
त्यानंतर दोन दिवसांपूर्वी दिल्लीत अमित शाह यांच्या घरी महायुतीच्या तीनही नेत्यांची बैठक पार पडली. ज्यामध्ये भाजपचाच मुख्यमंत्री होईल यावर शिक्कामोर्तब झालं. तेव्हापासून एकनाथ शिंदे हे प्रचंड नाराज झाल्याची चर्चा रंगली.
अमित शाह यांच्यासोबतच्या बैठकीनंतर दुसऱ्या दिवशी मुंबईत महायुतीची पुन्हा एक बैठक आयोजित करण्यात आली होती. पण एकनाथ शिंदेंनी अचानक ती बैठक रद्द करून ते थेट आपल्या दरे या गावी निघून गेले. मागील दोन-तीन दिवसांपासून शिंदे हे तिथेच आहेत. त्यांची प्रकृती ठीक नसल्याने ते तिथे असल्याचं सांगण्यात येत आहे.
मात्र, मुख्यमंत्री पद हुकल्याने आणि गृहखातंही भाजप सोडण्यास तयार नसल्याने शिंदे नाराज असल्याची चर्चा ही राजकीय वर्तुळात सुरू आहे.
असं असताना आता अचानक भाजपच्या प्रदेशाध्यक्षांकडूनच नव्या सरकारच्या शपथविधीचा मुहूर्त हा जाहीर करण्यात आला आहे. त्यामुळे आता एकनाथ शिंदे आणि त्यांचा शिवसेना पक्ष हा नेमकी कोणती भूमिका घेणार पाहणं महत्त्वाचं ठरणार आहे. तसंच एकनाथ शिंदेंच्या दबावापुढे भाजप त्यांच्यासाठी गृहखातं सोडणार का? याकडेही सर्वांचं लक्ष लागून राहिलं आहे.
हे वाचलं का?
