'आमच्या समोर 5 जणांना गोळ्या घातल्या, आम्ही घाबरून अजान म्हटली...', पुण्याच्या आसावरी जगदाळेंनी सांगितला थरकाप उडवणार थरार

'तुम्ही मोदींना डोक्यावर बसवून ठेवलंय..., असं म्हणाले अन् माझ्यासमोर 5 जणांना गोळ्या घातल्या'

आसावरी जगदाळे: आम्ही फिरायला आलो होतो. बैसरन व्हॅली परिसरात.. पूर्ण मोकळा मैदानी परिसर आहे हा. तिथेच दहशतवादी आले आणि त्यांनी गोळीबार सुरू केला. गोळीबार करताना त्यांनी जेवढेही हिंदू लोकं होते त्या सगळ्यांना पकडून धमकी दिली की, तुम्ही अजान म्हणा. जर नाही म्हणालात तर गोळ्या मारू. 

त्यावेळी तिथे माझे काका आणि वडीलही तिथेच होते. त्या दोघांनाही त्यांनी गोळ्या मारल्या. मोदींचं नाव ते आम्हाला बोलत होते की, तुम्ही मोदींना डोक्यावर बसवून ठेवलंय. तुमच्यामुळे आमचा धर्म धोक्यात आहे. असं ते बोलत होते. 

आम्ही महाराष्ट्रातील पुण्यातून आहोत. माझ्या बाबा आणि काकांना गोळ्या लागल्या आहेत. आम्ही आता पहलगाममध्ये आलो आहोत. मी आई आणि काकीसोबत आहे. आम्हाला काहीही अपडेट नाहीत. 3.30-4.00 वाजेच्या दरम्यान हल्ला झाला. तेव्हापासून आम्हाला काही अपडेट मिळालं नाही.

माझ्यासमोरच हे सगळं घडलं. आम्ही सगळे एका टेंटच्या मागे लपलेलो. ते तिथे आले आणि त्यांनी माझ्या वडिलांना तिथून उचललं आणि गोळ्या मारल्या. माझे काका खाली झोपले होते त्यांना गोळ्या मारल्या. आमच्या बाजूला एक कुटुंब होतं. त्यांच्यामधील 2 लोकांना गोळ्या मारल्या. आम्हाला सांगितलं की, अजान म्हणा नाहीतर आम्ही तुम्हालाही गोळ्या मारू.