काम रखडल्याचा आरोप

कुर्ला येथील कल्पना थिएटरजवळ नदीच्या पात्रात आणि किनाऱ्यांवर मोठ्या प्रमाणावर झाडीझुडपे उगवली आहेत. याशिवाय नदीपात्रात प्लास्टिकचा कचरा, घरगुती कचरा आणि बांधकामाचे साहित्य जागोजागी पडलेले पाहायला मिळत आहे. स्थानिक नेत्यांनीही पालिकेच्या दाव्यांवर आक्षेप घेतला असून, निश्चित मुदतीनंतरही अनेक ठिकाणी काम रखडल्याचा आरोप केला आहे. बीएमसीने एप्रिल महिन्यात मीठी नदीच्या सफाईचे कंत्राट मेसर्स प्रशांत लाड आणि तुळजा भवानी कन्स्ट्रक्शन्सला दिले होते, ज्याची अंतिम मुदत 10 जूनपर्यंत होती. मात्र, प्रत्यक्ष पाहणीत काम अपूर्ण असल्याचे उघड झाल्याने पालिकेच्या पारदर्शकतेवर प्रश्नचिन्ह निर्माण झाले आहे.

हे ही वाचा : पुण्यात आंदोलानंतर मुलाखतीत काय म्हणाला अभिजीत दीपके?

जर नदीची सफाई झाली नाही तर...

22 किलोमीटर लांबीची मीठी नदी ही मुंबईतील सर्वात मोठी 'स्टॉर्म वॉटर ड्रेन' (वादळी पावसाच्या पाण्याचा निचरा करणारी यंत्रणा) आहे. पावसाळ्यात मुंबईला पुरापासून वाचवण्यात या नदीची भूमिका अत्यंत महत्त्वाची ठरते. अशा परिस्थितीत, जर नदीची सफाई वेळेत आणि प्रभावीपणे झाली नाही, तर मुसळधार पावसात शहरात पूरस्थिती निर्माण होण्याची भीती वर्तवली जात आहे. या संपूर्ण प्रकरणावर मुंबईचे उपमहापौर संजय घाडी यांनी प्रतिक्रिया दिली असून, नदीची स्थिती अपेक्षेप्रमाणे स्वच्छ नसल्याची कबुली त्यांनी दिली आहे. आर्थिक अनियमिततेमुळे आधीचे कंत्राट रद्द करावे लागले होते आणि नवीन कंत्राटदाराची नियुक्ती एप्रिलमध्येच झाल्याने कामाला गती मिळण्यास थोडा वेळ लागल्याचे त्यांनी स्पष्ट केले.

हे ही वाचा : पंढरपूर : रोहित पवारांचं 'अन्नदात्यासाठी अन्नत्याग' आंदोलन, शेतकऱ्यांचा पाठिंबा आहे का?

'नागरिकांनी जबाबदारी ओळखावी'

उपमहापौर घाडी यांनी पुढे सांगितले की, केवळ प्रशासनावर विसंबून न राहता नागरिकांनीही नदीत कचरा टाकणे थांबवून आपली जबाबदारी ओळखली पाहिजे. नदीच्या सफाईदरम्यान चक्क एक ऑटो रिक्षा पात्रातून बाहेर काढण्यात आली, यावरून लोक नदी कशाप्रकारे प्रदूषित करत आहेत हे स्पष्ट होते. पावसाळ्यातही नदीतील गाळ काढण्याचे (डीसिल्टिंग) काम सुरूच राहील आणि बीएमसी या संपूर्ण प्रक्रियेवर बारीक लक्ष ठेवून आहे, अशी माहिती त्यांनी दिली. मुंबईकरांना पावसाळ्यात कोणत्याही मोठ्या समस्येला तोंड द्यावे लागणार नाही आणि जलकोंडी रोखण्यासाठी पालिका प्रशासन पूर्णपणे सज्ज आहे, असा विश्वासही त्यांनी व्यक्त केला.