फिरायला नेण्याच्या बहाण्याने...

अंबिका ही राकेशकडे लग्न करण्यासाठी सतत तगादा लावत होती. परंतु, राकेशला लग्नाची कोणतीही जबाबदारी नको होती आणि याच कारणावरून त्याने आपल्या प्रेयसीला कायमचे वाटेतून बाजूला करण्याचा कट रचला. पोलीस तपासात समोर आलेल्या माहितीनुसार, 7 जून रोजी राकेश अंबिकाला दुचाकीवरून फिरवण्याच्या बहाण्याने गोपालपूर येथे घेऊन गेला. दोघेही दिवसभर एकत्र होते आणि रात्रीच्या वेळी परतत असताना, अंकुली येथील ओव्हरब्रिजवरुन राकेशने अंबिकाला दुचाकीवरून खाली ढकलून दिले. पुलावरून थेट खाली कोसळल्यामुळे अंबिकाचा जागीच दुर्दैवी मृत्यू झाला. या क्रूर कृत्यानंतर आरोपीने कोणालाही संशय येऊ नये म्हणून हा एक रस्ते अपघात असल्याचे भासविण्याचा प्रयत्न केला.

हे ही वाचा : बदलापूर : 'माझी आई मेली..' चार वर्षांच्या मुलासमोर कारमध्ये काय घडलं?

कुटुंबियांना संशय

विशेष म्हणजे, घटनेनंतर राकेशने स्वतः अंबिकाच्या कुटुंबीयांना तिच्या मृत्यूची माहिती दिली आणि हा अपघात असल्याचे पटवून देण्याचा प्रयत्न केला. परंतु, त्याच्या बोलण्यातील विसंगती आणि घटनास्थळाची परिस्थिती पाहता अंबिकाच्या कुटुंबीयांना संशय आला. हा केवळ अपघात नसून यामागे मोठा कट असल्याचा संशय आल्याने, अंबिकाच्या काकांनी बैद्यनाथपुर पोलीस ठाण्यात तक्रार दाखल केली. पोलिसांनी तक्रारीची दखल घेत मृतदेह शवविच्छेदनासाठी पाठवला आणि घटनास्थळाची पाहणी केली. तपासादरम्यान पोलिसांना अनेक असे पुरावे मिळाले ज्यावरून हा अपघात नसून पूर्वनियोजित खून असल्याचे स्पष्ट झाले, त्यानंतर राकेशला अटक करून स्थानिक न्यायालयात हजर करण्यात आले.

हे ही वाचा : विवाहित पुरुषाबरोबर लिव्ह-इन-रिलेशनशिप, शेवटी भयंकर घडलं!

मृत मुलगी करायची नीटचा अभ्यास

मृत अंबिका ही गंजाम जिल्ह्यातील रोही गावची रहिवासी होती. ती अभ्यासात अत्यंत हुशार होती आणि तिने विज्ञान शाखेतून बारावीचे शिक्षण पूर्ण केले होते. वैद्यकीय प्रवेश परीक्षेची (NEET) तयारी करण्यासाठी ती ब्रह्मपूर येथे राहत होती. ती पुढे जाऊन डॉक्टर बनेल अशी तिच्या कुटुंबाला मोठी आशा होती, मात्र त्यापूर्वीच तिचा असा दुर्दैवी अंत झाला. याप्रकरणी भारतीय न्याय संहितेच्या कलमांतर्गत आरोपीवर गुन्हा दाखल करण्यात आला असून पोलीस पुढील तपास करत आहेत.