Maharashtra Vidhan Sabha 2026 LIVE: अधिवेशनाचा अठरावा दिवस, विधानसभेचं कामकाज सुरू | Eknath Shinde

एकनाथ शिंदे विधानसभेत बोलताना काय म्हणाले? 

एकनाथ शिंदे विधानसभेत बोलताना म्हणाले, या सभागृहात सन्माननीय अर्जुन खोतकर आणि शंभूराज देसाई यांनी सातारा जिल्हा परिषदेत झालेली घटना आपल्यासमोर मांडलेली आहे. त्याचा मी देखील साक्षीदार आहे. कारण ही निवडणूक प्रक्रिया जेव्हा सुरु झाली, त्यावेळी शंभूराज देसाई यांनी मला फोन केला होता. मकरंद पाटील पण तिकडे होते. ते म्हणाले की, दोन मतदारांवर पूर्वीच्या काळातील म्हणजे 5-10 वर्षांपूर्वीचा गुन्हा एक दिवस आधी दाखल केलाय आणि त्यांना अटक करणार आहेत. मी पोलीस अधिक्षकांना फोन केलेला आहे. ते म्हणाले, गु्न्हा दाखल झालेला आहे, आपण त्याच्यावर कारवाई नंतर करु. मी त्यांना एकच सांगितलं उद्या मतदान आहे. मतदानापासून कोणालाही वंचित ठेवता येत नाही. न्यायालय देखील मतदानापासून वंचित ठेऊ नका, असं सांगतं. एसपी म्हणाले, मी मतदानापासून वंचित ठेवणार नाही. त्यानंतर पोलीस महासंचालकांना फोन केला. त्यांना मी सांगितलं की, मला शंका आहे, दोन मत कमी करण्यासाठी आणि पराभव करण्यासाठी काहीतरी वेगळं घडू शकतं. मतदानापासून वंचित ठेवणे हा गुन्हा आहे. मी त्यांना सांगितलं, लोकशाहीचा गळा घोटण्याचा प्रयत्न करु नका. ते म्हणाले असं काही होणार नाही. परंतु, त्यानंतर मीडियामध्ये देखील मी पाहिलं. त्यांनी मंत्री बघितले नाहीत, पदाधिकारी बघितले नाहीत. आमदार बघितले नाहीत. आरोपीला पकडतात तसं पकडून घेऊन गेले. बरं मग त्यांनी दोनच मतदार कसे पकडले? दोनच मतदारांना ते घेऊन गेले. मी डिजींना फोन केला, ते म्हणाले, असं होणार नाही. मी म्हटलं निवडणूक तिकडं पार पडलीये. अशी परिस्थिती महाराष्ट्राच्या इतिहासा पहिल्यांदा पाहायला मिळाली. मतदानापासून वंचित ठेवणे यापूर्वी कधीही घडलं नाही. 

देवेंद्र फडणवीसांचा तातडीने मोठा निर्णय 

दरम्यान, एकनाथ शिंदेंनी हे मुद्दे मांडल्यानंतर मुख्यमंत्री देवेंद्र फडणवीसांनी सभागृहात याबाबत भाष्य केलं. ते म्हणाले, सन्माननीय उपमुख्यमंत्र्यांनी जी वस्तूस्थिती सांगितलेली आहे. त्या वस्तूस्थितीच्या आधारे या प्रकरणाची योग्य ती चौकशी केली जाईल. चौकशीतून जे निष्पन्न होईल, त्यानुसार कारवाई केली जाईल.