Rajya Sabha 2024 : मेधा कुलकर्णींना राज्यसभा! भाजपने एका दगडात मारले दोन पक्षी

२०१४ ला निवडून येत कोथरुडमध्ये आपलं स्थान पक्क केलेल्या मेधा कुलकर्णी यांना २०१९ ला उमेदवारी देण्यात आली नाही. त्यामुळे मेधा कुलकर्णी काहीशा नाराज झाल्या होत्या. सतत अन्याय झाल्याचा सूर लावणाऱ्या मेधा कुलकर्णींचं राजकीय पुनर्वसन करण्यात आलं. पण, या निमित्ताने भाजपने एकाच दगडात दोन पक्षी मारले आहेत. मेधा कुलकर्णींना उमेदवारी देऊन भाजपने नेमकं काय साधलं?

कोथरूड विधानसभेतील राजकारण

२०१९ ची विधानसभेची निवडणूक. चंद्रकांत पाटील यांना विधानसभेतून निवडणुकीच्या रिंगणात उतरवण्याचा निर्णय भाजपकडून घेण्यात आला. यावेळी त्यांच्यासाठी भाजपने सर्वात सुरक्षित असलेल्या कोथरुड मतदारसंघाची निवड केली.

कोथरुड मतदारसंघात मेधा कुलकर्णी या आमदार होत्या. चंद्रकांत पाटील हे मूळचे कोल्हापूरचे असताना त्यांना पुण्यातून आणि त्यातूनही कोथरुडमधून उमेदवारी दिल्याने त्या नाराज झाल्या. पण, हे त्यांच्यापुरतं मर्यादित राहील नाही. मेधा कुलकर्णी यांना डावललं गेल्याने पुणे शहर भाजपमध्ये देखील दोन गट पडले. मेधा कुलकर्णी यांचं राजकीय पुनर्वसन कसं करणार, असा प्रश्न त्यावेळी भाजप समोर निर्माण झाला होता. 

मेधा कुलकर्णींचं राजकीय पुनर्वसन

मधल्या काळात झालेल्या विधान परिषदेच्या निवडणुकांमध्ये कुलकर्णी यांना संधी दिली जाईल असं म्हटलं गेलं. परंतु त्यावेळी देखील त्यांना उमेदवारी देण्यात आली नाही. त्यामुळे मेधा कुलकर्णींना पुन्हा संधी मिळणार का असा प्रश्न कायम चर्चेत येत होता. त्यातच या काळात आपण पक्षासोबतच असणार असल्याचं मेधा कुलकर्णींनी स्पष्ट केलं होतं. पक्षनिष्ठा दाखवल्यामुळे अखेर त्यांना उमेदवारी देत भाजपने त्यांची नाराजी दूर केलेली आहे. 

राज्यसभेच्या निवडणुकीत लोकसभेची गोळाबेरीज 

मेधा कुलकर्णी यांना देण्यात आलेली उमेदवारी ही केवळ त्यांची नाराजी दूर करण्यापुरती नाही, तर येत्या निवडणुका डोळ्यासमोर ठेवून देण्यात आल्याचं म्हटलं जातं. कोथरुड, कसबा या विधानसभा मतदारसंघांमध्ये ब्राह्मण मतदारांची संख्या अधिक आहे. 

आपण कसब्याचं उदाहरण पाहिलं तर गेल्या ३५ वर्षांपासून भाजपचा गड असलेला या मतदारसंघात काँग्रेसने पोटनिवडणुकीत विजय मिळवला. भाजपकडून हेमंत रासने यांना उमेदवारी देण्यात आली होती. त्यावेळी भाजप कार्यकर्त्यांमध्ये देखील नाराजी होती. 

हेमंत रासने यांना उमेदवारी दिल्यानंतर ब्राह्मण उमेदवार हवा अशा आशयाचे पोस्टर कसब्यामध्ये लागले होते. अखेर काँग्रेसच्या रवींद्र धंगेकरांनी कसब्यावर विजय मिळवला. यावेळी भाजपवर ब्राह्मण मतदार नाराज असल्याचं स्पष्टपणे समोर आलं. ब्राह्मण उमेदवार न दिल्याने कसब्यातील मतदारांनी जाहीर नाराजी देखील व्यक्त केली होती.

कसब्यात देखील मेधा कुलकर्णी यांना उमेदवारी दिली जाईल अशी शक्यता वर्तवण्यात आली होती, परंतु तेव्हा तेखील त्यांना डावलण्यात आलं होतं. लोकसभेच्या निवडणुकीची चर्चा सुरु झाली तेव्हा देखील मेधा कुलकर्णी यांचं नाव अग्रक्रमाने घेतलं जात होतं. परंतु पुण्याच्या लोकसभेच्या जागेसाठी माजी महापौर मुरलीधर मोहोळ आणि माजी आमदार जगदीश मुळीक यांनी ताकद लावली होती. त्यामुळे लोकसभेला देखील कुलकर्णींना उमेदवारी मिळणार का असा प्रश्न होता.

निष्ठावंत मतदाराला बांधून ठेवण्याचा प्रयत्न

दुसरीकडे भाजपचा निष्ठावंत मतदार असलेल्या ब्राह्मण समाजाला दुःखवून भाजपला चालवणार नव्हतं. त्यामुळे पुण्यात ब्राह्मण उमेदवार देणं भाजपसाठी गरजेचं होतं. मेधा कुलकर्णी यांचा कोथरुड, बाणेरचा भाग गड राहिला आहे, परंतु उर्वरित पुण्यात त्यांना मतं मिळतील का ही भाजपला शंका होती.

माजी महापौर राहिलेल्या मुरलीधर मोहोळ यांनी कोव्हिडमध्ये केलेल्या कामामुळे पुणेकरांनी त्यांचं कौतुक केलं होतं. त्यातच मोहोळ यांच्या जनसंपर्कामुळे ते पुण्यात सर्वदूर पसरले होते. त्यामुळे लोकसभेला त्यांना उमेदवारी देण्याची शक्यता दाट आहे. अशातच मेधा कुलकर्णी यांना उमेदवारी देऊन भाजपने एका दगडात दोन पक्षी मारले आहेत.

भाजपचा कोअर मतदार असलेल्या ब्राह्मण समाजाला या उमेदवारीमुळे आपल्याकडेच ठेवण्यात भाजपला यश येईल दुसरीकडे लोकसभेला मुरलीधर मोहोळ यांना उमेदवारी देऊन भाजपकडून त्यांच्या जनसंपर्काचा उपयोग करुन घेता येईल. 

पुण्यातून दोन खासदार संसदेत असतील तर त्याचा फायदा विधानसभेला देखील भाजपला होण्याची शक्यता आहे. या उमेदवारीच्या माध्यमातून जास्तीत जास्त जागा निवडूण आणण्याचा भाजपचा मानस असू शकतो. आता मेधा कुलकर्णी या निवडूण येतात का आणि आल्यास पुण्याचं कसं प्रतिनिधित्व संसदेत करतात हे पाहणं महत्त्वाचं असणार आहे.